Tơ̆ jơ pơm lêh, Jơnŭm jang mŭk drăm Đăk Lăk hlôi hơlen lăng dơ̆ng dôm tơdrong jang tơgoăt, pơtrŭt mơdro sa, tơgŭm tơplih kơsô̆, plang song pham ‘mêm mơnat păng vei lăng sơđơ̆ng tơdrong hơrih sa tơpôl, pôk hơpăh dôm khŭl grŭp, rim bơngai đei jơnei 'lơ̆ng lơ̆m tơdrong jang pơjing păng hơtŏk tơiung dêh char Đăk Lăk. Ƀok Phạm Đông Thanh, Kơdră Khŭl mơdro sa dêh char Đắk Lắk akhan, Khŭl pơkăp hơnơ̆ng pơm gơng tơƀưh, tơgŭm hơmet pơ 'lơ̆ng mơmat tat, pơtrŭt jang hơdai păng hơtŏk 'lơ̆ng kĕ pơjei ăn anih mơdro sa:  “Nhôn sơkơ̆t hơdăh kơjă kăp gĭt đơ̆ng Khŭl jang tơ̆ tơdrong bơngai jang lơ̆m khŭl iŏk đei yă kiơ, anĭh mơdro sa tơgoăt đei hăm bu, tơdrong tơnap tap ayơ đei hơmet pơ 'lơ̆ng păng tơdrong hiôk ayơ pơih ăn. Vă hơtŏk tơ iung tĕnh koăng, kơjăp 'lơ̆ng bơ̆n kăl hơtŏk kơtang tơgoăt tơgoăl, hơtŏk kơtang bơ̆ jang vei lăng, tơplĭh 'nao kơmăi kơmŏk păng hơtŏk tơ iung pơm tơlĕch jrŭ, tơ iung pơjing hơnăn tơmam drăm tơring”.

Kiơ̆ trong tơlĕch jang hơtŏk tơiung mŭk drăm kơdih, truh sơnăm 2030, Đăk Lăk hơdrin đei hloh 29.000 anih mơdro sa bơ̆jang, tơring jang mŭk drăm kơdih tơgop hloh mĭnh poăt GRDP. Trĕng lăng truh sơnăm 2045, Đăk Lăk tơlĕch tơdrong hơgăt đei hloh 53.000 anih mơdro sa, tơgop dang 2/3 GRDP.

Vă iŏk đei tơdrong hơgăt jang tŏk mŭk drăm ƀar kơsô̆, Đăk Lăk  kăl kơ hơtŏk 'lơ̆ng đei yua dôm jên jang tơpôl, lơ̆m noh đei hơnăp jang gĭt kăl đơ̆ng anih jang mơ dro sa. Ƀok Y Nhuần Bya, Phŏ Kơ dră Anih vei lăng kon pơ lei dêh char Đăk Lăk pơma hơdăh, dêh char gô hơnơ̆ng vang yak hơdoi tơgŭm tơpôl  jang mơ dro sa hơtŏk tơiung:  “Dêh char sơkơ̆t hơdăh tơpôl mơdro sa jing anih jang hadoi kăp gĭt lơ̆m tơdrong hơtŏk tơ-iung. Tơdrong hơtŏk tơ-iung kơ anih mơdro duh jing pơkăp tơdrong jang đei jơnei păng hơmet pơ-lơ̆ng tơdrong asong jang tĕch mơdro. Dêh char gô pơtoi hơtŏk hơmet pơ-lơ̆ng hla bar hanh chĭnh, hơtŏk tơdrong tơbang hơdah lơ̆m tơlĕch pơm jang lơ̆m hla bar hanh chĭnh; akŏm pơklaih tơnap tap, tơhlăk tơhlĭn gah asong jang, teh, pơkăp, ming man păng hla bar tơrĕk truh tơdrong jang pơm tơlĕch tĕch mơdro; hơtŏk tơdrong pơma dơnuh, mơ̆ng păng xek tơlang tơtom dôm nơ̆r pơtruh trŏ ƀlep đơ̆ng anih mơdro sa.”