Lơ̆m tơdrong chơt hơ-iă tơbôl, 2 pah atŭm vih tơƀlŏk dôm tơdrong jang hơtŏk kăp gĭt lơ̆m tơdrong jang đei jơnei kơ 'Măng hop akŏm mă mônh kơ Hơnih jang tơbôl kơ Kuô̆k hô̆i Việt Nam păng Trung Quốc (8/2025).

Vă pơtoi kơhret tơdrong jang tơbôl kơ 2 teh đak lơ̆m khei năr truh, Kơdră Kuô̆k hô̆i Trần Thanh Mẫn păng Kơdră Kuô̆k hô̆i Triệu Lạc Tế drơ̆ng nơ̆r, 2 pah pơtoi asong khul kơpal, pơjing tơdrong jang chĭnh trĭ kơjăp sơđơ̆ng hloh ăn tơdrong jang hơdoi lơ̆m tôm tơdrong jang; pơkăp trong jang 'nao ăn tơdrong jang kơ 2 teh đak, mă kăl noh hơtŏk jang hơtŏ hơnơ̆ng, kơjăp sơđơ̆ng hloh, asong jang pơyua hloh, pơtoi pơm trong gre treng 'nao 'lơ̆ng, hơtŏk kơtang jang hơdoi gah khua hŏk kŏng ngê̆; hơtŏk hơnơ̆ng tơdrong ƀônh hiôk lơ̆m tơpôl ăn tơdrong jang tơbôl kơ 2 teh đak, hơtŏk jang tơbôl kơ rim tơring, hơpeh hơpong kon pơlei, jang hơdoi gah pơtho pơhrăm, joh ayŏ, tơmang pơhiơ̆; jang atŭm lơ tơdrong kơjăp hloh; atŭm vei lăng sơđơ̆ng trong sơlam teh păng hơlen lăng sek tơlang tơnăp hloh tơdrong tơhĭl, pơtoi sơđơ̆ng hiôk hian tơ̆ tơring đak dơsĭ.