Khul jang hơlen đei 17 'nu jing bơngai tang măt ăn rim hơnih jang, jơnŭm tơpôl păng kang ƀô̆ juăt jang, athei hơlen lăng, chih akŏm keh đang hơnăn linh lôch tang; chih hla bar hô sơ linh lôch tang, pơsat linh lôch tang; chih akŏm tơdrong sơkơ̆t hơdah tơring păng bieh um la kak chơ chă, sir kôch kơting linh lôch tang. Mă kăl, khul gô akŏm hơlen lăng, pơtêng dôm tơdrong tơroi tơbăt kơyuơ hơnih jang, kon pơlei chă tơroi, akŏm lơ̆m dôm tơdrong đei tơrĕk truh pơsat ƀŭ atŭm. Kiơ̆ đơ̆ng noh, akŏm hơlen hơdah, pơma đam, sơkơ̆t tơroi tơbăt, pơm trong chơ chă sir kôch kơting linh lôch tang.

Pơm kiơ̆ “Tơdrong jang 500 măng năr”, truh dang ei jơ̆p dêh char Gia Lai hlôi jang keh đang tơdrong iŏk kơcheh kơting tơ̆ 119 pơsat linh lôch tang, hăm 7.800 kơcheh vă akŏm hơlen pơkăp ADN. Khul jang kơpal hlôi sir kôch đei 63 kơting linh lôch tang. Dang ei khul jang kơ dêh char Gia Lai tŏk bŏk oei hơdrin chơ chă sir kôch dôm kơting linh lôch tang oei rah rai tơ̆ kơdrăn tơblah sơ̆.