Jô̆ truh đĭ khei 9, tơlĕch kon jên teh đak tơmơ̆t jang sơnăm 2026 kơ dêh char Lâm Đồng ‘nao jơnei 55% trong tơlĕch jang. Tơdrong tơm pơm ăn hiơ hiơ̆ tơlĕch kon jên jang đei Hơnih vei lăng kon pơlei dêh char sơkơ̆t hơdăh kơ yuơ bơ̆ jang tơlĕch jang kiơ̆, lơ̆m ou đei tơhlăk tơhlĭn tih tên hloh ‘noh găh tơdrong iŏk tơvih, chưk tơnă teh ming man. Lơ̆m 3 khei hơtuch sơnăm, akŏp kon jên teh đak tơmơ̆t jang mă dêh char Lâm Đồng kăl tơlĕch vă jê̆ 10.500 ti hlak jên. Trong jang mă dêh char  tơlĕch ăn ‘noh hơlêm, pơrô̆ athei bơngai tơmơ̆t jên jang đei hơnih teh ming man truh dang yơ iung jang ming man truh dang noh; ưh kơ ăn jang, tơƀôh tơbăt hơdăh lơ̆m mạng tơchă bơngai iŏk jang teh đak hăm rim bơngai tơmơ̆t jên jang iung jang ưh kơ ‘lơ̆ng. Ƀok Hồ Văn Mười, Kơdră chĕp pơgơ̆r Hơnih vei lăng kon pơlei dêh char Lâm Đồng, tơbăt, gô iung jang kơtang tơplih kang ƀô̆ tơring tơdăh đei ƀôh hiơ hiơ̆ iŏk tơvih đei teh păng jơ ‘năr tuch luch vă rim tơring đei tơdrong vă jang iung jang keh đang iŏk tơvih teh chưk tơnă teh ming man ‘noh năr 30/10 kơnh.