VOV4.Bahnar - ‘Năr brei (19/6), ƀok Phan Đình Trạc - Bơ ngai jang lơ̆m Anih tơm Chĭnh trĭ, Bí thư Trung ương Đảng,  Kơ dră Ban Nội chính Trung ương kŭm hăm Khŭl tang măt Kuôk hô̆i anih jang dêh char Lâm Đồng, hlôi tơ ƀơ̆p pơ ma dơ nuh hăm bơ ngai tăh hla tơ̆ xăh Đại Lào, pơ lei tơm Bảo Lộc păng xăh Liên Đầm, apŭng Di Linh. Tơ̆ dôm hơ nih tơ ƀơ̆p pơ ma dơ nuh, bơ ngai tăh hla tơ ƀôh jơ hngơ̆m đon chhôk hơ iă păng ‘nă hal găh jơ nei đơ̆ng ‘măng hop akŏm mă 3, mă loi ‘noh jĭ Kuôk hô̆i hlôi ‘măn lơ jơ pơ ma dơ nuh, pơ drơ̆ng kiơ̆ lơ tơ drong gĭt kăl.

Hơ dai hăm ‘noh, bơ ngai tăh hla ar hơ nơ̆ng apĭnh truh Khŭl tang măt Kuôk hô̆i anih jang dêh char Lâm Đồng dôm tơ drong đei ƀôh kăl kơ bơ ngơ̆t truh, hơ met pơ ‘lơ̆ng. Tang măt Khŭl bơ ngai tang măt Kuôk hô̆i anih jang dêh char Lâm Đồng, ƀok Phan Đình Trạc -  hlôi chih iŏk dôm nơ̆r tơ gop, apĭnh đơ̆ng bơ ngai tăh hla păng tơl nơ̆r kơ tă 1,2 tơ drong gơh jang. Hơ drô̆ tơ drong jang tang găn sa pơ jĭp, ƀok Phan Đình Trạc pơ ma hơ dăh gô ưh kơ đei tơ ring kơ̆m, ưh kơ lê̆ bu păng gô hơ nơ̆ng bơ̆ jang kiơ̆ kơ hret hloh tơ̆ hơ năp kơnh.

Thuem: Tơ blơ̆