‘Măng năm tơmang jĭ tôch gĭt kăl, jĭ tơdrong jang ăn khul kơdră kơpal mă blŭng kơ ƀar teh đak năm ngôi dih băl jô̆ đơ̆ng pơjing tơbôl ƀlep 45 sơnăm hơdrol (1980-2025). Kơsơ̆ năr 12/11, lăp đơ̆ng rŏng pơm lêh sơng, Kơdră chĕp pơgơ̆r Teh đak Lương Cường hlôi pơma đam hăm Ƀok pơtao Jordan. Lơ̆m jơ ‘năr pơma dơnuh dih băl phăl hơlăng păng hlôh vao dih băl, ƀar ‘nu kơdră chĕp pơgơ̆r drơ̆ng mĭnh nơ̆r vang hơnhăk tơgoăt tơgoăl dih băl yak truh jăl ‘nao. Ƀar păh kăl hơmet pơ ‘lơ̆ng jơhngơ̆m đon lui yom chinh trĭ ‘moi kiơ̆ rim tơdrong jang ăn khul kơdră năm ngôi dih băl, mă kăl rim Khul kơdră kơpal. Adoi pơtrŭt kơtang jang hơdoi lơ̆m rim tơdrong jang kăl, lơ̆m ou đei vei lăng sơđơ̆ng teh đak, sơđơ̆ng tơring, tơbăt dih băl kơtơ̆ng ang, ăn khul joăt jang tơƀơ̆p dih băl ... Lơ̆m tơdrong jang mŭk drăm, ƀar ‘nu kơdră chĕp pơgơ̆r drơ̆ng mĭnh nơ̆r pơjing rơvơn ăn tơdrong plôih ‘măng tech răt dôm tơmam drăm kăl dih băl, adoi pơtrŭt hơnih mơdro sa ƀar teh đak chă tơchĕng hơlen dôm tơdrong gơ̆h jang hơdoi, tơmơ̆t jên jang, mă kăl lơ̆m rim tơdrong atŏk tơ iung trong hnam, mŭk drăm rơgoh ‘lơ̆ng, mŭk drăm kơsô̆, viễn thông, pơm tơlĕch tơmam drăm choh jang sa … Ƀok pơtao Jordan athei ƀar teh đak chă tơchĕng hơlen hrôih pơih trong gre păr iung păr kơtă. Ƀar ‘nu kơdră chĕp pơgơ̆r jei pơma dơnuh rim tơdrong vă pơm hơtŏk kơtang jang hơdoi găh tơdrong jang pơgang, ‘nou jing tơdrong jang gơh hơgei hloh kơ Jordan, mă kăl lơ̆m rim tơdrong khăm hơmet jĭ jăn đơ̆ng hơtăih, jang kiơ̆ kmăi kmŏk lơ̆m tơdrong bơ̆ jang pơgang…