Pơgê năr 15/9, tơ̆ Hnam Kuô̆k hô̆i, Tổng Bí thư, Kơdră chĕp pơgơ̆r Teh đak Tô Lâm hăm Hơkăn ƀok pơm tơm pơm lêh sơng Ƀok pơtao Thái Lan hăm Hơkăn ƀok. ‘Măng năm tơmang đei pơgơ̆r ƀlep lơ̆m jơ ‘năr ƀar teh đak pơgơ̆r tơbăt 50 sơnăm pơjing tơbôl-hơyak gĭt kăl ‘lơ̆ng rŏ lơ̆m chăl sơnăm atok tơ iung tơgoăt tơgoăl dih băl. ‘Măng năm tơmang đơ̆ng Ƀok pơtao Thái Lan pơm hơdăh rim nơ̆r pơkăp pơma dơnuh dih băl kơdră kơpal ƀar păh khul kơdră chĕp pơgơ̆r ƀar teh đak lơ̆m khei năr ou ki, mă kăl pơma pơkăp atŏk tơ iung jơnei tơdrong jang kăl “Pêng tơgoăt”. ‘Noh Tơgoăt tĕch răt, tơgoăt jang hơdoi pơm tơlĕch păng muk drăm ƀar teh đak; Tơgoăt hơnih mơdro sa păng tơring; Tơgoăt rim tơdrong jang kăl atŏk tơ iung kơjăp ‘lơ̆ng; hơdrin hrôih hơnhăk tĕch răt dih băl iŏk đei truh 25 ti dolar kiơ̆ trong hơtŏ hơnơ̆ng, kơjăp ‘lơ̆ng. ‘Măng năm tơmang gô tơbăt hơdăh hơyak ‘nao lơ̆m chăl sơnăm tơgoăt tơgoăl dih băl ƀar teh đak, hơnhăk tơdrong tơgoăt tơgoăl Việt Nam-Thái Lan atŏk tơ iung roi năr roi kơtang, tơpă, kơjăp păng jơnei, kơ yuơ đei iŏk yoa kơ kon pơlei ƀar teh đak, kơ yuơ rơngei hiôk hian, sơđơ̆ng păng hơnuk hơnoa kơ tơring.