Tơ̆l 76 sơnăm, sŏk ko tơ bôk, mă lei ƀok Ksor Chuel tơ̆ plei Rưng Ama Nhiu, xăh Ia Rbol oei tôch hơbăng, hơbĕch hơbal, đei bưng ai tih nhen thoi đe kră pơlei tơ̆ Gia Lai. Rim năr, ƀok oei hơnơ̆ng chĕp vei tơdrong juăt đŏk hla ar, tơchĕng hơlen trobng jang, tơdrong tơgŭm đơ̆ng Đảng păng teh đak vă roi tơbăt, tơgŭm ăn kon pơlei; ‘ngoăih kơ ‘nŏh, ƀok oei hơnơ̆ng pơtho thơ̆ng ăn đe hơioh lơ̆m pơlei bơ̆n nơ̆r Anh, tơdrong juăt đơ̆ng sơ̆, tơdrong arih xa lơ̆m tơpôl…

Ƀok Ksor Chuel tơroi: “Inh adrin pơlung mih ma duch nă kon pơlei ăn kon hơ ‘lơ̆p năm hŏk, băt chư ‘nŏh gơh hŏk bơ̆n tơdrong jang, hŏk kơjung ƀiơ̆ vă đei tơdrong jang, arih xa sơđơ̆ng ƀiơ̆ păng đei teh đak kla jên khei. Hiôk ăn kơdih hai, plang pơyơ̆r, tơgop ăn tơpôl hai.”

Jĭ 1 lơ̆m dôm tơdăm Jarai mă blŭng đei hŏk tơ̆ hnam trưng sư phạm đơ̆ng rŏng kơ tơblăh rơngei, lơ̆m hlŏh 30 sơnăm bơ̆ jang, ƀok Ksor Chuel hlôi pơtho ăn rơbâu ‘nu hŏk tro tơ̆ dôm pơlei pơla. Lơ bơngai lơ̆m kơsô̆ âu dang ei jĭ ƀak si, ki sư, kăn ƀô̆, bơngai jang ăn teh đak. Bu bu kŭm ƀlŏk kơ ƀok thây hlôi pơtho ăn kơdih kâu oei ‘lơ̆p sơ̆.

Mŏ Nay H’bloanh (bơngai Jarai) jang tơ̆ Anih joh ayŏ kơ dŏ xoang – tơpôl xăh Ia Rbol, hŏk tro so kơ ƀok Ksor Chuel, tơroi: “Ƀok thây Ksor Chuel jĭ bơngai pơtho ăn inh kŭm hăm lơ bơngai lơ̆m jơhnơr nhôn ƀât hŏk kâp 2 sơ̆. Đơ̆ng thây pơtho ăn, đon adrin đơ̆ng kơdih, inh adrin hŏk pơhrăm păng dang ei đei đăi jang ăn teh đak tơ̆ xăh Ia Rbol. Inh tôch lui yom, ‘mêm bơnê kơ ƀok thây. Gơnơm đơ̆ng thây pơtho mă nhôn adrin hŏk vă gơ̆h jing bơngai, đei đon hlôh vao pơvih ăn tơpôl.”

Đơ̆ng rŏng kơ pơdơ̆h pơtho, ƀok Ksor Chuel hơnơ̆ng đei lơ bơngai tơ̆ lơ pơlei pơla lơ̆m xăh Ia Rbol băt truh hăm kơchư̆k pơm Kơdră vei lăng Khul pơtrŭt hŏk pơhrăm xăh. Oh Nay Lê Quốc Duy (14 sơnăm, bơngai Jarai), tơ̆ plei Rưng Ama Nhiu ăn tơbăt, mĕ ƀă inh hơnơ̆ng iŏk ƀok Chuel vă roi tơƀôh găh đon rơgei, đei đon adrin ăn ‘nhŏng oh nhôn ‘moi kiơ̆. Nhôn kŭm hơnơ̆ng tơƀâp ƀok thây păng đei ƀok thây pơlung athei adrin hŏk.

“Lơ̆m dôm tơdrong jŏh ayŏ kơ dŏ xoang dăh mă năr lêh tơ̆ pơlei, ƀok Ksor Chuel hơnơ̆ng pơtho ăn jơhnơr mơlôh nhôn arih athei đei đon hơpơi ‘mĕh, păng vă pơm ăn tơdrong hơpơi ‘mĕh jing tơdrong đei tơpă tơ̆ yăn âu ‘nŏh athei adrin hŏk pơhrăm. Kơdih kâu ning mônh kơnh inh ‘mĕh jing thây pơtho Toan, oh oei adrin hŏk, ôn ƀai vă thi mât tơ̆ hnam trưng chuyên kơ dêh char păng ning mônh kơnh hŏk Đại học sư phạm. Mưh jing ƀok thây oh vă pơtho tơƀôh ăn jơhnơr đơ̆ng rŏng dơ̆ng.” Oh Nay Lê Quốc Duy pơma thoi noh.

Xăh Ia Rbol đei 2.236 unh hnam, hăm 10.220 ‘nu bơngai, lơ̆m noh đei vă jê̆ 93% jĭ bơngai Jarai. Dôm sơnăm  âu ki kon pơlei hơnơ̆ng mât 1 ƀơ̆r đon, adrin jang tŏk mŭk drăm, dar dĕh klăih đơ̆ng tơnuh hin; atŭm hăm ‘nŏh jang kiơ̆ ‘lơ̆ng dôm trong jang đơ̆ng Đảng, khôi luơ̆t teh đak păng ưh đei lê̆ lu bơngai kơnê̆ pơhlŭ pơhlôm, ưh đei bơngai bu put kiơ̆ nơ̆r bơngai kơnê̆ pơhlŭ. Kơsô̆ hŏk tro năm hŏk đei vă jê̆ 100%.

Kiơ̆ ƀok Nguyễn Chí Cường, Kơdră vei lăng kon pơlei xăh Ia Rbol, tơdrong ‘nâu gơnơm đơ̆ng tơdrong krao hơvơn, tơƀôh trong chong glung đơ̆ng đe kră pơlei, ƀok pơgơ̆r pơlei păng bơngai đei bưng ai, đei kon pơlei lui yom, lơ̆m noh đei Ƀok thây rơgei Ksor Chuel: “Thây Ksor Chuel hơnơ̆ng năm hơdrol, jang tôch tơnăp mưh bơ̆ jang kiơ̆ dôm trong jang đơ̆ng Đảng, khôi luơ̆t teh đak. Adrin pơtho tơƀôh, pơlung kon hơ ‘lơ̆p, ‘nhŏng oh lơ̆m hnam, mih ma duch nă lơ̆m pơlei tơ̆ xăh Ia Rbol bơ̆ jang đei yoa ‘lơ̆ng dôm trong tơgŭm đơ̆ng Anih vei lăng kon pơlei xăh tơlĕch. Atŭm hăm ‘nŏh, bơ̆ jang ‘lơ̆ng tơdrong atŏk tơiung mŭk drăm, vei lăng sơđơ̆ng tơ̆ tơring.”

Mă đơ̆ng đĭ kră, pă gan pran jăng nhen sơ̆ bơih, mă lei ƀok Ksor Chuel oei đĭ jơhngâm, bơ̆jang tôch tơnăp ăn pơlei pơla. Tơ̆ ƀok, rim bơngai oei ƀôh jơhngâm đon arih xa ‘lơ̆ng – roi kră đon roi rơgei, vang tơgop jơhngâm pơjing tơpôl bơngai Jarai tơ̆ pơlei pơla kơtang nuih mơng roi đunh roi pơdrŏng ‘lơ̆ng rŏ.