Tơ̆ jơ sơng, ƀok Tô Lâm hmach chơt hơ iă ăn Kơdră tang măt hlôi jang keh đang tơdrong bơ̆ jang tơ̆ Việt Nam, tơgop gĭt kăl lơ̆m pơtrŭt kơtang tơgoăt tơgoăl Việt Nam-Qatar pơma atŭm, tơdrong jang tơgoăt tơgoăl jang hơdoi ƀar păh Dơnŏ anĭh tơm Kŏng ang hăm rim Hơnĭh bơ̆ jang Tĕh đak Qatar pơma hơdrô̆.

Ƀok Tô Lâm sơng pơma dơnŭh hăm kơdră tang măt Qatar tơ̆ Việt Nam Mohamed Ismael Al-Emad

Ƀok Tô Lâm tơbăt, ‘moi kiơ̆ tơdrong “Drơ̆ng mĭnh nơ̆r jang hơdoi găh tang găn hơlau păng iung tơjră phă pơrăm khŭl yoch klŏh klĕch tĕh đak ƀar păh Dơnŏ anĭh tơm Kŏng ang Việt Nam păng Dơnŏ anĭh tơm vei lăng sơđơ̆ng Tĕh đak Qatar” kĭ pơkăp sơnăm 2014, tơgoăt tơgoăl jang hơdoi ƀar păh tĕh đak lơ̆m lơ tơdrong jang. Ƀok Tô Lâm lui, pơtôch jang hơdoi ƀar păh tĕh đak gô atŏk kơtang hlŏh dơ̆ng, tơgăl hăm tơdrong đei, rơvơn adoi nhen ‘mĕh vă păng tơgoăt tơgoăl ‘lơ̆ng hơ iă ƀar tĕh đak, mă kăl ‘nŏh lơ̆m bơ̆ jang vei lăng sơđơ̆ng tĕh đak, sơđơ̆ng lơ̆m tơpôl.