Tơ̆ jơ xơng, ƀok Nguyễn Trọng Nghĩa adoi tơroi hăm ƀok Tổng ƀĭ thư, Kơdră teh đak Lào ƀok Thongloun Sisouluth găh tơdrong đei jơnei kơ Pơma đam lĭ luâ̆n mă 9 kơ 2 Đảng, xơkơ̆t Pơma đam lĭ luâ̆n mă 9 noh tơnăp, pơm kiơ̆ trŏ tơdrong đei ƀôh hăm rim Đảng, dôm tơdrong pơma đam tơƀôh tơdrong nhan, tơdrong kăp gĭt păng tơlĕch lơ trong pơklaih kăp gĭt; xơkơ̆t rim anih jang hơlen lĭ luâ̆n kơ 2 Đảng gô pơtoi jang atŭm kơjăp, hơtŏk tơroi tơbăt găh lĭ luâ̆n, tơroi găh tơdrong hlôh vao vă atŭm pơm jang đei jơnei Tơchơ̆t Hop akŏm kơ rim Đảng.

Ƀok Tổng ƀĭ thư, Kơdră teh đak Lào Thonglun Sisoulith bơnê kơ tơdrong đei jơnei đơ̆ng Pơma đam păng hơpơi 'moih lơ̆m khei năr truh, 2 anih jang Twên yăo Trung ương, 2 Jơnŭm lĭ luâ̆n Trung ương pơtoi jang hadoi kơjăp, hơtŏk tơroi tơbăt, pơma đam găh dôm tơdrong kăl păng tơdrong hơlen chih akŏm găh lĭ luâ̆n, đon kơchĕng păng tơroi tơbăt ăn tơdrong pơkăp trong jang hơtŏk tơ iung adoi nhen tơroi dih băl găh tơdrong hlôh vao lơ̆m tơdrong pơjing chuh nghĩa xăh hô̆i tơ̆ rim teh đak.