Tơ̆ Hop akŏm, ƀok Tổng ƀĭ thư Nguyễn Phú Trọng, Kơdră teh đak bơ̆n Nguyễn Xuân Phúc, Thủ tướng teh đak bơ̆n Phạm Minh Chính xơkơ̆t, pôk bơnê kơ tơdrong adrin kơ 'nôh, tơdrong yuk hơlâu păng dôm tơdrong jang đei jơnei đơ̆ng Anih jang Đảng Kŏng ang Trung ương, Anih tơm Kŏng ang lơ̆m xơnăm 2022; xơkơ̆t, khul Kŏng ang Kon pơlei hlôi keh đang rơgei xơnong jang đei pơjao.

Găh xơnong jang lơ̆m khei năr truh, ƀok Tổng ƀĭ thư Nguyễn Phú Trọng pơkăl, Anih jang Đảng Kŏng ang Trung ương pơtoi chĕp vei xơnong yuk hơlâu, lăng tơgĭt tơdrong pơ 'lơ̆ng Đảng, pơjing khul Kŏng ang kon pơlei, lăng âu jing xơnong jang tơm dơnơm kơ xơnăm 2023 păng dôm xơnăm pơtoi; chĕp vei xơnong dơnơm lơ̆m pơgơ̆r vei xơđơ̆ng tơpôl, tơgop hơtŏk jang đei jơnei dôm tơchơ̆t Trung ương găh hơtŏk mŭk drăm – tơpôl păng vei xơđơ̆ng tơpôl teh đak truh xơnăm 2030, xơkơ̆t truh xơnăm 2045 kơ 6 tơring lơ̆m jâ̆p teh đak; adrin pơtoi jang đei iŏk lơ jơnei 'nao păng keh đang tơnăp hloh xơnong jang đei pơjao, tơ̆ anăp noh xơnăm 2023 păng pơđĭ jăl jang 2020 – 2025.