Kơsơ̆ năr 31/10, tơ̆ Hnam Akŏm tơm Kon pơlei, đơ̆ng rŏng kơ lêh xơng, Ƀok Tổng ƀĭ thư Nguyễn Phú Trọng hlôi pơma đam hăm Ƀok Tổng ƀĭ thư, Kơdră teh đak Trung Quốc Tập Cận Bình.

Ƀok Tổng ƀĭ thư Nguyễn Phú Trọng pơma đam hăm Ƀok Tổng ƀĭ thư, Kơdră teh đak Trung Quốc Tập Cận Bình.

Lơ̆m tơdrong chơt hơ iă tơnăp, tơpăt jue, ƀar ƀok kơdră hlôi pơma đam găh tơdrong jang kơ rim Đảng, rim teh đak păng tơbôl đơ̆ng ƀar Đảng, ƀar teh đak. Ƀok Tổng ƀĭ thư Nguyễn Phú Trọng xơkơ̆t, Việt Nam păng Trung Quốc jing 2 teh đak tơjê̆ kông đak minh hơbon, adoi jing teh đak xăh hô̆i chuh nghĩa kơyuơ Đảng Cộng sản pơgơ̆r. Ƀar păh drơ̆ng nơ̆r pơtoi pơma đam kơpal hơnơ̆ng đơ̆ng khul kơpal 2 Đảng, ƀar teh đak vă hơtŏk tơbôl hlôh vao dih băl, tơtom pơma đam, xek tơlang dôm tơdrong đei ƀôh lơ̆m tơbôl 2 păh, pơtoi tơdrong jang hadoi păng hơtŏk tơ iung hơ iă, xơđơ̆ng tơpôl Việt - Trung.

Pơtôch pơma đam, ƀok Tổng ƀĭ thư Nguyễn Phú Trọng atŭm hăm ƀok Tổng ƀĭ thư, Kơdră teh đak Trung Quốc Tập Cận Bình hlôi bơ̆ng pang lêh kĭ pơm jang đơ̆ng dôm Anih jang Tơm, dôm tơring kơ 2 teh đak K6 pơkăp hla bar jang hadoi lơ̆m 'măng năm tơmang.

Lơ̆m tơdrong pơma đam, ƀar ƀok Tổng ƀĭ thư duh pơma đam găh dôm tơdrong jang hadoi, drơ̆ng nơ̆r hơtŏk pran, jang đei jơnei dôm tơdrong jang mŭk drăm, tĕch pơdro, axong jang, pơjing tơdrong dơnơm kơjăp ăn hơtŏk tơbôl 2 păh; ră hơdăh Việt Nam – Trung Quốc noh jang hadoi tĕch pơdro jing kăp gĭt păng hơdrŏk mŭk drăm hăl dih băl. Ƀok Tổng ƀĭ thư, Kơdră teh đak Trung Quốc Tập Cận Bình xơkơ̆t, Trung Quốc gô kơ 'nôh pơtoi vei tơdrong hơtŏk tơbôl tĕch pơdro Trung - Việt kiơ̆ pơkăp roi năr roi hơtŏ hloh; pơm trong hiôk ăn Việt Nam tĕch tơlĕch tơmam choh pơtăm, 'long bri, ka hơdang ăn teh đak Trung Quốc lơ̆m khei năr truh.