Pơma ah Hop akŏm, Ƀok Tổng Bí thư Tô Lâm sơkơ̆t hơdah kơ tơdrong hơdrin, trong jang tơnăp păng dôm tơdrong jang đei jơnei đơ̆ng Đảng uy Trung ương, Anih tơm Kŏng an lơ̆m sơnăm 2024. Atŭm hăm noh tơrĕk hơdah gah 3 tơdrong kăl akŏm pơgơ̆r jang lơ̆m khei năr truh: Mă mônh noh, Kŏng an athei chih akŏm hơdah tơdrong jang lơ̆m anglŏ sơnăm 'nao, anglŏ sơnăm hơtŏk tơ-iung kơ teh đak, athei băt hơdah păng jang khŏm mă keh nơ̆r tơtă đơ̆ng Ƀok Kơdră Hồ Chí Minh “Kŏng an athei pơkăp jang. Kŏng an ưh gơh năm hơnô̆ kơ kŏng ngĭp, choh jang xa, tĕch pơdro, trong nơnăm. 'Lơ̆ng hloh noh Kŏng an athei yuk hơlâu”.

Ƀok Tổng Bí thư Tô Lâm lui ngeh, hăm tơdrong juăt jue tơguăt tơguăl, đon tơchĕng kơjăp tơchĕng thoi yơ jang thoi ăi hloi, khĭn pŭ tôm sơnong, đe đŏng chĭ athei keh đang tơnăp tơdrong jang sơnăm 2025; pơlong jang đei jơnei lơ vă sơng kơ kuh kơ dôm năr lêh, năr tơƀlŏk kăp gĭt kơ teh đak lơ̆m sơnăm 2025 păng 80 sơnăm Năr juăt jue Kŏng an Kon pơlei Việt Nam.