VOV4.Bahnar – Tơ̆ Anih jang Liên hơp kuôk tơ̆ New York, teh đak Mih, ƀok Tổng Thư kĭ Liên hơp kuôk António Guterres hlôi xơng Kơdră jang tang măt Đặng Hoàng Giang, Kơdră Khul Kơpal Việt Nam pơm jang tơ̆ Liên hơp kuôk. Ƀok Tổng Thư kĭ Guterres chơt hơ iă hăm Việt Nam hlôi đei rơih jang lơ̆m Jơnŭm jang găh xơnong pơm tơm kơ Kon bơngai kơ Liên hơp kuôk jăl jang 2023-2025, lui ngeh Việt Nam gô pơtoi tơgop kăp gĭt, đei jơnei lơ̆m tơdrong hơtŏk vei xơnong pơm tơm kơ kon bơngai. Ƀok Tổng Thư kĭ chơt hơ iă xơkơ̆t ƀok gô năm tơmang Việt Nam ƀơ̆t tơbăt 45 xơnăm Việt Nam vang jang lơ̆m Liên hơp kuôk (1977-2022).

Kơdră tang măt Đặng Hoàng Giang ră hơdăh tơdrong kăp gĭt kơ 'măng năm tơmang đơ̆ng ƀok Tổng Thư kĭ, xơkơ̆t Việt Nam pơkăp adrin tơgop ăn tơdrong jang atŭm kơ Liên hơp kuôk, lơ̆m noh đei hơtŏk dôm Tơchơ̆t Hơtŏk tơ iung kơjăp, tơjră hăm hơyuh tô̆ 'mi tơplih păng pơtoi vei xơđơ̆ng rơngei tơpôl apŭng plenh teh.

VOV/Lan tơblơ̆