Hơdrol kơ ‘noh lơ̆m năr, Hơnih chĕp pơgơ̆r Trung ương tơbăt hơdăh tơdrong tơchơ̆t đơ̆ng Ban Bí thư pơjao ăn ƀok Trần Phong, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Hơnih vei lăng kon pơlei dêh char Quảng Trị, iŏk jang Kơ iĕng Kơdră chĕp pơgơ̆r Đảng dêh char Khánh Hòa jăl jang 2025–2030. Iung pơma lơ̆m jơ iŏk tơdrong jang, ƀok Trần Phong pơma tơbăt jơhngơ̆m đon hôn bơnê đei Hơnih tơm Chinh trĭ păng Ban Bí thư lui yom pơjao ăn tơdrong jang, adoi pơma pơkăp gô atŏk kơtang jang ‘lơ̆ng hơnăp jang kơ yuơ tơdrong atŏk tơ iung kơ dêh char păng tơdrong hơrih sa kơ Kon pơlei. Ƀok sơkơ̆t hơdăh, gô atum hăm khul kơdră chĕp pơgơ̆r dêh char tơlĕch jang kiơ̆ jơnei Tơdrong tơchơ̆t Hop akom tih Đang ƀô̆ dêh char, rim trong pơkăp, trong jang tơgum djru gĭt kăl đơ̆ng Trung ương ‘măn ăn Khánh Hòa; hơnơ̆ng tơ iung pơjing Đang ƀô̆ rơgoh ‘lơ̆ng, pran kơtang, tơplih ‘nao trong chĕp pơgơ̆r, pơm hơtŏk bơ̆ jang chĕp pơgơ̆r ‘lơ̆ng; pơm hơtŏk jơhngơ̆m đon pơ̆n tơchĕng, pơ̆n iung jang vă tơlĕch jang kiơ̆ jơnei trong tơlĕch jang ba Khánh Hòa đei jing pơlei tơm găh Trung ương lơ̆m sơnăm 2030.