VOV4.Bahnar - Kơ sơ̆ ‘năr 8/2, năm tơ mang, hmach Têt păng bơ̆ jang tơ̆ Anih tơm vei lăng găh pơ tho pơ hrăm, Bơ ngai jang lơ̆m Anih tơm Chĭnh trĭ, Phŏ kơ dră chĕp kơ̆l pơ gơ̆r Kuôk hô̆i Trần Thanh Mẫn tơ tă, tơ̆ hơ năp kơnh lăng kăl hloh pơ tho pơ hrăm jơ hngơ̆m đon ‘lơ̆ng, băt ‘mêm băl, gơh pơ cheh, mă loi ‘noh jĭ pơ tho pơ hrăm jơ hngơ̆m đon ‘mêm kơ teh đak, chhôk ‘nă, pơ yom hơ drĕch hơ drŭng...tơ iung tơ drong hơ pơi ‘meh hơ tŏk tơ iung teh đak hơ nŭk hơ noa, hiôk hian. Tơ roi dôm tơ drong oei đei, ưh kơ ‘lơ̆ng lơ̆m noh đei 2 grŭp tơ drong đei bơ ngơ̆t truh ‘noh jĭ tơ plih ‘nao tôm tong tơ drong pơ tho pơ hrăm păng vei sơ đơ̆ng ‘lơ̆ng pơ tho păng hŏk lơ̆m khei ‘năr jĭ Covid-19, ƀok Trần Thanh Mẫn athei, anih pơ tho pơ hrăm kăl kơ tơ chă hơ len dôm tơ drong tơm pơm ăn ưh kơ hơ iă, pơm pơ hơi, đei dôm trong jang ƀơ̆t măt, đunh đai, mă hơ dăh vă hơ met pơ ‘lơ̆ng. Hơ dai hăm ‘noh athei, Anih vei lăng Jŏh ayŏ - Pơ tho pơ hrăm păng Anih tơm vei lăng pơ tho pơ hrăm kăl kơ đei tơ drong jang hơ dai hơ nơ̆ng, đei yua, vă tơ tom hơ met pơ ‘lơ̆ng dôm tơ drong đei ƀôh đơ̆ng yan âu; kăl kơ pơ klep hơ dai kơ jăp pơ tho pơ hrăm hăm tơ chĕng hơ len, tơ lĕch jang, tơ mơ̆t yua dôm jơ nei khoa hŏk păng kơ măy kơ mŏk ‘nao; jang kiơ̆ pơ tho pơ hrăm kiơ̆ ‘meh vă đơ̆ng anih tơ chă bơ ngai jang.

Thuem: Tơ blơ̆