VOV4.Bahnar - Tơ̆ Hnam Kuôk hô̆i, Phŏ Kơ dră Kuôk hô̆i Trần Thanh Mẫn hlôi sơng bơ ngai tang măt kơ ƀok Kơ dră tơm teh đak Mi găh Tơ plih tŏ ‘mi kial John Kerry, tŏk bŏk đei ‘măng năm tơ mang bơ̆ jang tơ̆ Việt Nam. Phŏ Kơ dră Kuôk hô̆i Trần Thanh Mẫn pơ ma hơ dăh: jĭ 1 lơ̆m teh đak pŭ ƀơm ưh kơ ‘lơ̆ng kơ tang hloh yua đơ̆ng tơ plih tŏ ‘mi kial, mă loi ‘noh tơ̆ tơ ring Tơ măn đak krong Cửu Long, kơ lih thoi noh, Việt Nam băt hơ dăh tơ jră hăm tơ plih tŏ ‘mi kial ‘noh jĭ tơ drong jang. Tơ̆ hơ năp kơnh, Kuôk hô̆i Việt Nam gô hơ nơ̆ng yak hơ dai hăm Khŭl kơ dră teh đak pơ jing păng jang pơ keh tơ drong jang khôi luơ̆t vă pơ trŭt hơ tŏk tơ iung ŭnh hơ yuh nhen ŭnh điên kial, ŭnh điên măt ‘năr; hơ met ming dơ̆ng dôm tơ drong tơm đơ̆ng Tơ drong jang hơ tŏk rơ goh; ‘meh vă Mi hơ tŏk loi dơ̆ng tơ gŭm Việt Nam găh jên hu, kơ măy kơ mŏk, anih jang kăl, pơ tho bơ ngai jang păng hlôh vao tơ plih ŭnh hơ yuh Việt Nam kĕ jang kiơ̆ tôm dôm nơ̆r pơ kăp tơ̆ COP26.

Thuem: Tơ blơ̆