VOV4.Bahnar - Pơ gê ‘năr 29/5, tơ̆ apŭng Bá Thước, dêh char Thanh Hóa, pơ gơ̆r lêh tơ lĕch jang Hơ druh tơ dăm năm iung jang tơ gŭm pơ yan he 2022 yua đơ̆ng Trung ương Đoàn hơ druh tơ dăm Cộng sản Hồ Chí Minh pơ gơ̆r. Tơ drong jang Hơ druh tơ dăm năm jang tơ gŭm pơ yan pơ dơh he sơ năm 2022 tơ lĕch jang hăm lơ tơ drong jang ‘lơ̆ng tơ̆ 74 apŭng dơ nuh hin găh 26 dêh char, 54 xăh mơ mat tat dêh hloh tơ ring tơ ter đak dơ sĭ păng achon đak dơ sĭ găh 12 dêh char păng 33 pơ lei hơ druh hơ dăm pơ jing tơ drong jang sa yua đơ̆ng Trung ương Đoàn tơ mơ̆t jên jang pơ jing jăl jang 2001- 2020. Tơ drong jang tơ gŭm pơ yan he sơ năm ‘nâu pơ gơ̆r đơ̆ng ‘năr 01/6 truh ‘năr 31/8 hăm trong jang tơm jơ̆p jang - sơ đơ̆ng - đei yua - kơ jăp tơ klep hăm hơ năp jang chĭnh trĭ, 'meh vă yan âu đơ̆ng rim tơ ring, anih jang. Pơ ma tơ̆ lêh tơ lĕch jang, Phŏ Kơ dră Kuôk hô̆i Trần Thanh Mẫn athei: anih jang Đoàn kăl kơ hơ nơ̆ng băt hơ dăh tơ drong jang hơ druh tơ dăm năm iung jang tơ gŭm pơ yan he ‘noh jĭ 1 ‘măng hŏk pơ hrăm chĭnh trĭ gĭt kăl, ‘moi kiơ̆ tơ drong jang vă pơ tho pơ hrăm đon tơ chĕng kach mang, jơ hngơ̆m đon ‘lơ̆ng ăn đoàn viên, hơ druh tơ dăm, tơ iung ming jơ hngơ̆m đon jang tơ gŭm, ling lang plang jơ hngơ̆m ăn dôm tơ drong đei yua iĕ ioch đơ̆ng kơ dih yua kơ tơ drong đei yua ăn tơ pôl, yua kơ tơ drong hơ nŭk hơ noa kơ teh đak.

Thuem: Tơ blơ̆