Pơgê ‘năr 02/3/2023, tơ̆ ‘Măng hop akŏm ưh kơ ê ‘măng mă 4, Kuôk hô̆i jăl XV hlôi set hơlen, tơchơ̆t tơdrong jang bơngai jang gĭt kăl pôk pơm Kơdră teh đak Cộng hòa xã hội chủ nghĩa Việt Nam jăl jang 2021-2026. Kiơ̆ kơ ‘noh, ƀok Võ Văn Thưởng, Bơngai jang lơ̆m Anih tơm Chĭnh trĭ, Chĕp kơ̆l pơgơ̆r Ban Bí thư Trung ương Đảng jăl XIII, tang măt Kuôk hô̆i jăl XV hlôi đei pôk pơm Kơdră teh đak hăm pơtôch 487/488 bơngai tang măt Kuôk hô̆i drơ̆ng lăp ( dang 98,38%). 

Lơ̆m ƀai iung pơma iŏk kơ chư̆k jang lăp đơ̆ng rŏng kơ ‘noh, Kơdră teh đak Võ Văn Thưởng pơma hơdăh ưh kơ pơ dơh vei lăng pơjing păng hơtŏk jơhngơ̆m pran tơgoăt pôm ƀơ̆r đon đĭ đăng hơdrĕch hơdrŭng, tơpăt răp mơ̆ng dôm nơ̆r tơgop yua kơ kon pơlei, yua kơ teh đak đơ̆ng rim bơngai Việt Nam ‘mêm kơ teh đak; vei kơjăp gĭt kăl đon tơchĕng “kon pơlei ‘noh tơm”; iŏk tơdrong đei yua trŏ ƀlep đơ̆ng kon pơlei ‘noh hơnih jang blŭng, jĭ tơdrong hơgăt gĭt kăl đơ̆ng dôm trong jang, “Tơdrong kiơ đei yua ăn kon pơlei, bơ̆n athei jang đĭ jơhngơ̆m. Tơdrong kiơ pơrăm truh kon pơlei, bơ̆n athei mă veh ver”. Khŏm iung jang tang găn sa pơ gơ̆m pơ jĭp, ưh kơ ‘lơ̆ng, chih pơkeh hrơ̆ch 1 ‘măng trong jang hơtŏk tơiung kơjăp; pơ jing khŭl jang teh đak rơgoh, pran kơ jăp.