VOV4.Bahnar - Tơ̆ măng 27/3, tơ̆ cham xă Đinh Tiên Hoàng Đế, dêh char Ninh Bình pơm lêh tih tơ băt 200 sơ năm đei krao hơ năn Ninh Bình păng 30 sơ năm pơ jing dơ̆ng dêh char. Tang măt ăn kơ dră chĕp kơ̆l Đảng, tĕh đak, ƀok Võ Văn Thưởng, Kơ dră jang lơ̆m Anih tơm Chinh trĭ, Kơ dră chĕp kơ̆l Ban Bí thư hơ iă, pôk pơ ư, tơ chĕng ‘lơ̆ng dôm tơ drong jơ nei mă Đảng ƀô̆, khul kơ dră tơ ring păng kon pơ lei Ninh Bình iŏk đei lơ̆m dôm sơ năm âu ki.

Kơ dră chĕp kơ̆l Ban Bí thư Võ Văn Thưởng (Kơ pi iŏk đơ̆ng Ƀăo Ninh Bình)

Tơ băt 200 sơ năm đei krao hơ năn Ninh Bình păng 30 sơ năm pơ jing dơ̆ng dêh char ‘nŏh jĭ jơ năr vă Đảng ƀô̆ păng kon pơ lei Ninh Bình pơ đou dơ̆ng jăl trong jang tŏk ‘lơ̆ng hơ iă adrol ki, pơm ăn sư jing jơ hngâm pran, jing tơ drong bơ̆ jang đơ̆ng rim anih jang đảng, rim kăn ƀô̆, đảng viên păng kon pơ lei Ninh Bình tơ̆ hơ năp kơnh; adrin truh sơ năm 2030, Ninh Bình tŏk jing dêh char đei ƀôh păh lăp tơ̆ tơ ring tĕh tơ măn đak krong Hồng.

Ƀok Võ Văn Thưởng pơ ma hơ dăh, Ninh Bình athei iŏk yoa pơ đĭ dôm tơ drong pran ‘lơ̆ng, đei hơ drô̆ đơ̆ng kơ dih, mă loi jĭ tơ drong ‘lơ̆ng găh hơ nih tơ guăt jơ̆p tơ ring Găh tu, Tơ ring Tŏk bŏk păng Tây Bắc, đei lơ̆m tơ ring 4 pang jang tŏk mŭk drăm Hà Nội - Hải Phòng - Quảng Ninh - Thanh Hóa.

Dơ̆ng: Tơ blơ̆