Tơ̆ hop akŏm mă 2, Jơnŭm pơgơ̆r kon pơlei dêh char Đắk Lắk jăl XI, đơ̆ng 2026-2031 pơgơ̆r rơih bơngai jang kiơ̆ hơnăp jang, pôk hơtŏk dơ̆ng bơngai jang kơchư̆k Phŏ kơdră vei lăng kon pơlei dêh char păng Bơngai jang lơ̆m Anih vei lăng kon pơlei dêh char, atŭm hăm ‘nŏh hơlen năng, asong pơdơ̆h jang hăm 1 ‘nu Bơngai jang lơ̆m Anih vei lăng kon pơlei dêh char vă hơmet pơ ‘lơ̆ng khul kơdră chĕp kơ̆l pơgơ̆r Anih vei lăng kon pơlei dêh char. Jơnŭm pơgơ̆r kon pơlei dêh char Đắk Lắk hlôi drơ̆ng nơ̆r pôk ƀok Y Nhuân Byă, Kơdră jang lơ̆m Anih chĕp kơ̆l đảng dêh char, Phŏ Kơdră Anih pơgơ̆r jang đảng dêh char pơm Phŏ kơdră Anih vei lăng kon pơlei dêh char Đắk Lắk jăl XI, đơ̆ng 2026-2031.

Pôk ƀok Hồ Quang Đệ, Kơdră jang lơ̆m Anih chĕp kơ̆l Đảng dêh char, Kơdră Anih vei lăng ming man dêh char mât jang lơ̆m Anih vei lăng kon pơlei dêh char Đắk Lắk jăl XI, đơ̆ng 2026-2031. Jơnŭm pơgơ̆r kon pơlei dêh char Đắk Lắk oei drơ̆ng nơ̆r ăn tơdrong tơchơ̆t asong pơdơ̆h jang lơ̆m Anih vei lăng kon pơlei dêh char Đắk Lắk jăl XI, đơ̆ng 2026-2031 hăm ƀok Trần Văn Tân, sơ̆ pơm Kơdră Anih vei lăng jên hu dêh char, yoa đei athei bơ̆ jang tơdrong jang nai. Tơdrong hơmet ming dôm kơchư̆k jang lơ̆m Anih vei lăng kon pơlei dêh char Đắk Lắk đei pơm kiơ̆ tơdrong hơgăt đơ̆ng khôi luơ̆t, pơm lăp hăm tơdrong hơmet pơ ‘lơ̆ng khul kơdră chĕp kơ̆l đơ̆ng rŏng kơ pơm kiơ̆ dôm tơdrong tơchơ̆t găh tơdrong jang kăn ƀô̆, atŭm hăm ‘nŏh pơm ‘lơ̆ng, đei yoa ăn tơdrong vei lăng, pơgơ̆r jang đơ̆ng khul kơdră tơring lơ̆m chăl ‘nao.