Ƀơ̆t blŭng xơnăm, Puih mak 'nao, kơsơ̆ năr 16/1, tơ̆ pơlei tơm Kon Tum, Anih juăt jang Đảng dêh char Kon Tum pơgơ̆r Tơjrâ̆m dôm bơngai hŏk kơjung, văn ngê̆ sih, ƀăo chĭ, ƀok A Pớt, Phŏ Ƀĭ thư Juăt jang anih jang Đảng dêh char Kon Tum ră hơdăh, xơnăm 2022, dêh char Kon Tum tơjră hăm lơ tơnap tap, chŏng mă hăm tơdrong tơguăt tơguăl, drơ̆ng nơ̆r kơjung, Đảng ƀô̆, jơnŭm pơgơ̆r tơring, khul linh păng kon pơlei kon kông hlôi adrin jang đei iŏk jơnei kăp gĭt lơ̆m noh đei tơdrong tơgop đơ̆ng dôm bơngai hŏk kơjung, văn ngê̆ sih, ƀăo chĭ.  

Hăm tơdrong 'meh vă dôm bơngai hŏk kơjung, văn ngê̆ sih, ƀăo chĭ pơtoi yak hadoi atŭm hăm tơdrong hơtŏk tơ-iung kơ dêh char, ƀok A Pớt pơkăl rim jăl jang, rim anih jang pơtoi pơm trong hiôk vă ăn dôm bơngai hŏk kơjung, văn ngê̆ sih, ƀăo chĭ pơm jang. Atŭm hăm noh, tơrĕk xek tơlang dôm tơdrong pơtruh trŏ ƀlep, pơyua tơgăl tơrĕk truh anih jang, tơdrong jang mă po pơgơ̆r.