Trong man thơthŭr tôch môch pơlei Ka Đô, tơring Ka Đô, dêh char Lâm Đồng hrei ou ưh khan lăp yak kloh klĕch đơ̆ng dôm hnam năm truh tơ̆ chun mir mă sơ̆ hlôi hlŭt hleng rim ‘măng pơyan ‘mi truh. Ƀar păh jih trong, dôm pơbŭng hnam hơdrou ƀlĭk ƀlăk tơƀưh dih băl, tơƀôh hơdăh ăn mĭnh tơring choh jang sa tŏk bŏk roi năr roi tơplih ‘nao.

Ŭnh hnam ƀok Ma Ren ‘noh jĭ dôm ŭnh hnam yŭk trong hơlou lơ̆m choh jang sa kiơ̆ trong hle. Đơ̆ng 5 sao hơmrĕ pĕn (nơ̆r Yuăn akhan hơmrĕ chuông), ‘nhot hla sơƀrei pơtăm lơ̆m hnam hơdrou, atŭm hăm rong hloh 50 tŏ nhŭng lai sơke păng vă jê̆ mơjĭt tŏ rơmo, mĭnh sơnăm ŭnh hnam ƀok jang sa iŏk đei 500 triu hlak jên mưh đĭ tơklăh kon jên tơmơ̆t jang. Nơ̆r pơma tơ-‘ngla iung jang hloi, ƀok Ma Ren hlôi jing bơngai đei kon pơlei lui yom hloh lơ̆m dêh char Lâm Đồng. Ƀok yŭk trong hơlou lơ̆m lơ tơdrong kơ pơlei, đơ̆ng plang ăn teh păng pơrô̆ hơvơn kon pơlei plang ăn teh vă pơm trong ‘lơ̆ng, truh jang kiơ̆ păng lang să rim trong choh jang sa gơh hơgei. Ƀok Ma Ren tơbăt: "Kơdih ba hăm rim khul hơnơ̆ng chă pơrô̆ hơvơn kon pơlei tơ iung pơjing trong pơlei, koeng ƀôt rơgoh ‘lơ̆ng. ‘Meh vă kon pơlei pơ̆n tơplih ‘long pơtăm ‘noh kơdih bơ̆n kăl pơm jŭk yŭk trong hơlou. Mưh ƀôh đei iŏk yoa kơjăp ‘noh kon pơlei mă lui păng jang kiơ̆. Truh dang ei lơ ŭnh hnam hlôi jang kiơ̆ kih thuơ̆t, đei plei lơ, jang sa iŏk yoa kơjăp hloh pơtêng hăm sơ̆".

Tơdrong tơgop đơ̆ng dôm bơngai đei kon pơlei lui yom nhen ƀok Ma Ren tŏk bŏk hơnơ̆ng lang sa tơ̆ lơ pơlei pơla kơ dêh char Lâm Đồng. Tơ̆ tơring Đam Rông 2, Bí thư Chi bộ thôn 2, Kon Yông K'Khiếp hlôi pơtăm hrou krô̆i ưh kơ đei găr, sâu riêng păng theng thôih Yuăn lơ̆m 5ha chehphe, hơnhăk đei iŏk yoa hloh 1 ti lơ̆m mĭnh sơnăm. Đơ̆ng trong jang ou, lơ ŭnh hnam hlôi tơplih choh jang sa, jang kiơ̆ kmăi kmŏk hơgei. Truh dang ei, lơ̆m tơring, đei hloh 478ha choh jang sa jang kiơ̆ kmăi kmŏk hơgei, pơjing đei 14 mã kơsô̆ tơring pơtăm păng 11 khul jang sa hơdoi, tơgop pơm hơtŏk kơjă tơmam drăm choh jang sa păng pơjing đei tơdrong jang sa sơđơ̆ng. ‘Nhŏng Kon Yông K'Khiếp tơbăt:"Jĭ đang viên nei kơna ba jang hơdrol, hơdrin hŏk pơhrăm atŏk tơ iung choh jang sa, pơtăm chehphe hrou hăm sâu riêng, krô̆i ưh kơ đei găr, theng thôih yuăn, atŏk tơ iung mŭk drăm ŭnh hnam. Mưh trong jang đei iŏk yoa kơjăp, kon pơlei mă lui păng jang kiơ̆. Tơdrong hơ iă hloh ‘noh truh dang ei đei lơ ŭnh hnam jang kiơ̆ trong pơtăm hrou, tơdrong hơrih sa hlôi đei tơplih hơ iă".

Rŏ năng vă chă pơma, bơngai đei kon pơlei lui yom pơjing đei jơhngơ̆m lang să kơtang ưh khan hăm nơ̆r pơma mă lei hăm dôm trong choh jang sa đei iŏk yoa kơjăp. Mưh kon pơlei lui păng jang kiơ̆, rim trong bơ̆ jang, tơdrong tơgŭm djru đơ̆ng Teh đak hlôi tơlĕch jang kiơ ‘lơ̆ng. Jăl jang 2021 - 2026, ŭnh hnam dơnuh lơ pang kơ dêh char hlôi tơjur đơ̆ng 9,33% jur pă 3,33%, hơtŏ hăm tơjur vă jê̆ 50.000 ŭnh hnam dơnuh. Lơ̆m dêh char đei 80 tơring iŏk đei jing tơring tơrang ‘nao, 3 tơring iŏk đei jing tơring tơrang ‘nao ‘lơ̆ng hơ iă păng 1 tơring iŏk đei jing tơring tơrang ‘nao pơm yă. Kiơ̆ đơ̆ng ƀok Bùi Ngọc Sơn, Kơ iĕng Kơdră chĕp pơgơ̆r Hơnih vei lăng Kon kông păng Lui khop dêh char Lâm Đồng, lơ̆m dêh char hrei ou đei dang 880 ‘nu bơngai đei kon pơlei lui yom lơ̆m bơngai kon kông păng lui khop. ‘Nou jĭ khul gĭt kăl hloh vang yak hơdoi hăm khul kơdră chĕp pơgơ̆r tơring hơnhăk rim trong bơ̆ jang, tơgum djru đơ̆ng teh đak yak mơ̆t lơ̆m tơdrong hơrih."Sơnong jang kơ bơngai đei kon pơlei lui yom lơ̆m khei năr ou ki 'noh jĭ gĭt kăl hloh lơ̆m tơdrong tơgop ăn jang hơtŏk mŭk drăm - tơpôl tơ̆ tơring kon pơlei kon kông păng groi kông. Đe sư ưh hơdrô̆ jĭ gơng tơroh hơnhăk tơchơ̆t jang đơ̆ng Đảng, Teh đak truh hăm kon pơlei, mă oei kơtă pơm trong choong glung, yuk hơlou lơ̆m hơtŏk jang xa, pơjing trong jang đei yua kơjăp. Đơ̆ng jơhngơ̆m pran kơ dôm bơngai yuk trong ou, lơ unh hnam kon pơlei tơ̆ Lâm Đồng hlôi jang kiơ̆, tơgop tih tên ăn tơdrong jang tơjur unh hnam hin dơnuh tơ̆ tơring tơrang, tơring kon pơlei kon kông păng groi kông".

Jăl trong man tơ̆ Ka Đô hrei ou ưh hơdrô̆ pơih trong truh chŭn mir jang sa mă oei pơih trong jang xa 'nao ăn pơlei pơla. Tơdrong tơchơ̆t tơgŭm đơ̆ng Teh đak pơm trong hiôk, oei bơngai đei kon pơlei lui yom 'noh pơjing jơhngơ̆m đon lui. Đei bơngai yuk hơlou pơjing trong jang kơjăp vă rim pơlei pơla kon kông tơ̆ Lâm Đồng jang hơtŏk mŭk drăm, vă yak hloh đơ̆ng hin dơnuh kơjăp sơđơ̆ng jơhngơ̆m đon kơdih iung jang.