Hop akŏm đei 310 'nu tang măt ăn bơngai tơgŭm jơhngơ̆m păng 'nhŏng oh linh lôch tang truh đơ̆ng 34 dêh char, pơlei tơm lơ̆m jơ̆p teh đak truh akŏm. Tơ̆ hop akŏm, Thủ tướng atŭm hăm đe kơdră kơpal kơ Đảng, Teh đak pơjao tơmam pôk ăn kơ Mĕ Việt Nam Anh hùng, pơdreo tơmam drăm ăn unh hnam linh lôch tang păng pơtơm tơdrong jang “Pôk bơnê”.

Pơma ah hop akŏm, Thủ tướng Lê Minh Hưng ră hơdah sơnong jang vei lăng, ƀlŏk bơnê kơ dôm tơdrong đei jơnei đei đơ̆ng tơdrong plang tih tên đơ̆ng rim bơngai yuk hơlou; athei pơtoi keh đang tơchơ̆t tơgŭm hăm bơngai tơgŭm jơhngơ̆m ăn teh đak, hơtŏk kơtang tơdrong chơ chă sir kôch, pơkăp hơnăn măt đe linh lôch tang, vei lăng 'lơ̆ng hloh ăn tơdrong hơrih kơ rim unh hnam mă teh đak tơchơ̆t tơgŭm păng hơtŏk tơdrong pơtho tơbăt đon bơnôh 'mêm kơ teh đak ăn đe sơnăm mơlôh. Atŭm hăm noh, Thủ tướng krao hơvơn tôm tơpôl pơm kiơ̆ tơnăp tơdrong vei lăng bơngai tơgŭm jơhngơ̆m ăn kăch mạng, yak truh tơbăt 80 sơnăm Năr Linh jĭ rơka – Linh lôch tang ăn teh đak.