Anih vei lăng kon pơlei dêh char Đắk Lắk ‘nao jang hơdai hăm Anih jang Kanh sat vei lăng bơ̆jang găh sơđơ̆ng tơpôl “Anih tơm vei lăng Kŏng an), Kŏng an dêh char păng Kŏng ti GeneViet pơgơ̆r tơdrong jang iŏk kơmâu ADN đơ̆ng ŭnh hnam bơngai linh lôch tang ăn teh đak tam mă băt đei hơnăn. ‘Nâu ưh khan lăp jing tơdrong jang ƀlŏk bơnê ƀlep ƀơ̆t năr 27/7 mă oei jing hơyak tơlĕch jang hơdăh ‘lơ̆ng “Tơdrong jang 500 măng năr tŭn pran tơchă, sir iŏk akŏm păng hơlen lăng hơnăn kơting linh lôch tang ăn teh đak” tŏk bŏk đei tơlĕch jang jơ̆p lơ̆m teh đak.

 Kiơ̆ chih jô̆, lơ̆m dêh char Đắk Lắk dang ei đei 15.222 tŏ pơsat linh lôch tang ăn teh đak. Lơ̆m noh, dôm anih jang kơpal hlôi hơlen lăng, chih iŏk kơtơ̆ng ang đơ̆ng 10.235 linh lôch tang ăn teh đak; ‘nao đei 5.911 ‘nu băt đei hơnăn, oei 4.324 ‘nu linh lôch tang ăn teh đak tam mă băt đei hơnăn. Kăl kơ lăng truh, đei 2.706 ‘nu linh lôch tang ăn teh đak oei đei ŭnh hnam đei tôm tơdrong hiôk vă iŏk kơmâu ADN, hăm akŏm kơsô̆ 3.865 ‘nu. ‘Măng tơlĕch jang âu tơlĕch ăn tơdrong hơgăt iŏk hloh 70% kơsô̆ kơmâu đei tôm tơdrong hiôk vă pơjing hơnih chih răk ADN kơ teh đak, pơyua ăn tơdrong hơlen lăng hơnăn kơting linh lôch tang ăn teh đak tơ̆ hơnăp kơnh.

Vă tơdrong iŏk kơmâu pơgơ̆r hrơ̆ch, trŏ tơdrong păng sơđơ̆ng trŏ lăp, Kŏng an dêh char Đắk Lắk hlôi hơmet ăn 12 hơnih iŏk kơmâu lơ̆m dêh char, hơvơn khŭl lĭnh đơ̆ng dêh char truh tơ̆ xăh kơtă pơtho, tơgŭm kon pơlei chih hơmet hla ar hô sơ, băt hơdăh tơdrong kơtơ̆ng ang păng iŏk kơmâu tơmam. Đại tá Võ Hùng Tường, Kơdră Hơnih jang Kanh sat vei lăng bơ̆jang găh sơđơ̆ng tơpôl, Kŏng an dêh char Đắk Lắk tơbăt:

"Nhôn jang atŭm kơjăp hăm rim hơnih juăt jang kơ Hơnih jang vei lăng hanh chĭnh, asong khŭl jang tơ̆ 12 hơnih akŏm kơcheh kơting păng gô akŏm iŏk đơ̆ng năr 23 truh năr 26/7/2026. Rim khŭl adoi đei bơngai jang vă iŏk akŏm adoi nhen sơkơ̆t hơdah kơtơ̆ng ang kơ 'nhŏng oh vă vei sơđơ̆ng tơdrong akŏm kơcheh kơting mă hơdah"

Đei măt tơ̆ hơnih iŏk kơmâu tơ̆ phường Ea Kao, yă H'Blak Niê chĕp ba tơdrong răp gô đơ̆ng pơđĭ ŭnh hnam. Ma sư ‘noh linh lôch tang ăn teh đak mă lei lơ sơnăm âu ki ưh kơ băt đei hơnih iung tơblăh, hơnih lôch dăh mă pơsat ƀŭ. Hăm ŭnh hnam yă, tơdrong iŏk kơmâu ADN ưh kơ hơdrô̆ jing 1 hla ar bơ̆jang mă jing tơdrong hiôk vă tơgoăt dơ̆ng 1 tơley tơgoăt ŭnh hnam đĭ kơtĕch yua đơ̆ng tơblăh vang.

"Đảng păng Teh đak iŏk kơcheh kơting pơkăp ADN vă 'nhŏng oh linh lôch tang, ŭnh hnam gơh sô̆ chơt, tơ̆k hơdah tơdrong hơpơi vă nhôn gơh chă ƀôh mih ma kơdih po"

Tơdrong gĭt kăl đơ̆ng tơdrong jang ‘măng âu ưh khan lăp oei tơ̆ kơmăy kơmŏk ‘nao mă oei tơ̆ tơdrong ‘lơ̆ng ‘mêm mơnat gĭt kăl. Rim kơmâu ADN đei vei răk năr ‘nâu rŏ lăng tam mă ăn băt hơdăh hloi, mă lei gô jing 1 tơdrong pơtrơp gĭt kăl lơ̆m hla ar chih răk kơ teh đak, ling lang hơlen lăng mưh đei dơ̆ng kơtơ̆ng ang găh kơting linh lôch tang ăn teh đak đei iŏk akŏm. ‘Noh kŭm jing trong vă khoa hŏk vang yak hơdai hăm jơhngơ̆m đon băt “Nhă đak ƀlŏk kơtu”, tơgŭm tơdrong jang ƀlŏk bơnê ưh kơ dơ̆ng hê̆ tơ̆ dôm tơdrong lêh ƀlŏk hơnơ̆r mă hơnơ̆ng hăm dôm tơdrong jang hơdăh ‘lơ̆ng. Yua kơ đơ̆ng rŏng hloh 1 puăt anglŏ rơngei, tơdrong lơ chang gô hloh oei jing 1 năr bơngai lơ̆m ŭnh kơdih đei krao trŏ hơnăn, đei vih hơlơ̆k dơ̆ng hăm pơlei pơla. Păng rim kơmâu ADN đei iŏk ‘noh jĭ đei dơ̆ng 1 tơdrong hơmĕng vă dôm ‘măng oei hơdai đơ̆ng rŏng tơblăh vang jăh jing tơpă.