Hơnih jang vei lăng kon pơlei dêh char Đăk Lăk pơtruh nơ̆r gah tơdrong pơkăp 'lơ̆ng tơdrong pơtho pơhrăm athei tơjur pơhlom 50% hơnih jang vei lăng lơ̆m hnam trưng hŏk, kơjung hloh tơdrong pơkăp đơ̆ng Trung ương. 'Nou jĭ tơdrong đei ră hơdah lơ̆m 'măng hop akŏm hăm dôm hơnih jang păng 102 xah, phương gah trong pơkăp 'lơ̆ng hnam trưng hŏk, ah mă Đăk Lăk jĭ minh lơ̆m 15 tơring đei Trung ương rơih jang hơdrol. Dang ei jơ̆p dêh char đei 1.238 hơnih pơtho pơhrăm kŏng lơ̆p. Trong jang kơ dôm tơring athei tơjur 462 hnam trưng, lơ̆m kơplah Hơnih Pơtho Pơhrăm athei tơjur 690 hnam trưng, atŭm hăm noh pơjing lơ hnam trưng pơtoi dôm jăl hŏk. Phŏ Kơdră Hơnih jang vei lăng kon pơlei dêh char Đăk Lăk Nguyễn Thiên Văn pơgơ̆r tơdrong hơmet 'lơ̆ng athei đei pơm jang trŏ ƀlep hăm tơdrong kĕ đei kơ rim tơring; hơdrô̆ tơjur hơnih jang vei lăng, ưh đei tơplih hơnih hŏk pơhrăm kơ đe hŏk tro.

Anih vei lăng kon pơlei dêh char Khánh Hòa ‘nao drơ̆ng nơ̆r trong jang proh hơmet anih pơtho pơhrăm kơ teh đak, hơmet ăn sơnăm hŏk 2026-2027. Kiơ̆ hla ar chih hơmet, lơ̆m dêh char gô tơjur 248 hnam trưng teh đak, hơtŏ dang 34% kơsô̆ anih jang đei dang ei, pơm lăp hăm ‘meh vă tơ jur tŏ sĕt tôch ai 30% kiơ̆ athei đơ̆ng Khŭl kơdră teh đak. Dang ei Khánh Hòa đei 728 anih pơtho pơhrăm kơ teh đak hăm hloh 26.500 kang ƀô̆ vei lăng, ƀok thây kô pơtho păng bơngai jang. Đơ̆ng rŏng proh hơmet, dôm hnam trưng oei pơvei bơ̆ jang pơtho hŏk, vei sơđơ̆ng anih jang, tơmam drăm pơyua ăn hŏk tro; hơdrô̆ dôm hnam trưng teh đak rong ‘me hŏk tro kon kông păng hnam trưng joăt pơtho anai tam mă bơ̆jang kiơ̆ proh hơmet. Hăm kang ƀô̆ vei lăng rơkăh, dêh char gô set hơlen ăn năm jang tơ̆ dôm anih jang trŏ lăp dah mă hơmet ăn pơtho pơhrăm hơlơ̆k dơ̆ng; dôm bơngai đei ‘meh vă pơdơh gô đei hơmet ăn pơdơh kiơ̆ tơdrong hơgăt.