Lơ̆m 'măng tơƀơ̆p, Ƀô̆ trương Lê Hoài Trung sơkơ̆t hơdah Việt Nam lăng Hoa Kỳ jĭ minh lơ̆m dôm teh đak jang hơdoi kăp gĭt hloh, hơpơi 'meh atŭm hăm Hoa Kỳ pơtoi hơtŏk jang tơbôl kơ 2 teh đak gơh đei jơnei hloh, trŏ ƀlep hăm tơdrong pơyua kơ kon pơlei 2 teh đak, tơgop kăp gĭt ăn tơdrong rơngei hiôk hian, sơđơ̆ng, jang hơdoi păng hơtŏk tơ-iung tơ̆ tơring păng lơ̆m apŭng plenh teh. Lơ̆m tơdrong tơƀơ̆p, 2 pah drơ̆ng nơ̆r pơtoi jang hơdoi vă hơmet tơdrong răm đơ̆ng tơblah tơblŭng sơ̆, hơmet 'lơ̆ng tơdrong 'mê̆ đơ̆ng pơgang dioxin, hơlen plôih ƀôm min, tơgŭm bơngai hơven hơvo jo jăn, chơ chă linh Hoa Kỳ lôch hiong lơ̆m tơdrong tơblah, adoi nhen chơ chă sir akŏm păng sơkơ̆t hơdah hơnăn măt ăn linh lôch tang Việt Nam.

Ƀô̆ trương Lê Hoài Trung tơroi gah dôm tơdrong hơdrin đơ̆ng Đảng păng Jơnŭm pơgơ̆r teh đak Việt Nam lơ̆m tơdrong hơtŏk kơtang chơ chă, sir kôch akŏm păng sơkơ̆t hơdah hơnăn măt ăn linh lôch tang kơ Việt Nam, atŭm hăm noh bơnê kơ tơdrong tơgop kăp gĭt gah hô sơ, tơroi tơbăt, kơmăi pơkăp ADN đơ̆ng gah Hoa Kỳ asong ăn păng pơtruh nơ̆r hăm Hoa Kỳ pơtoi pơih să tơdrong jang hơdoi păng akŏm jơhngơ̆m pơm jang ăn tơdrong jang ou.