Kiơ̆ tơdrong drơ̆ng nơ̆r đơ̆ng Hơnih jang tơm gah Gre păr Việt Nam, 'măng păr hơlen lăng vă pơkăp sơđơ̆ng đei pơgơ̆r đơ̆ng năr 23 truh năr 28/7 vă sơkơ̆t hơdah tơdrong 'lơ̆ng hăm kơmăi kơmŏk păng unh pơchră trong păr 'nao đei ming hơmet. Đơ̆ng rŏng keh đang ming hơmet, Cham gre păr apŭng plenh teh Liên Khương hlôi jang atŭm hăm dôm cham gre păr nai pơkăp hơmet ming dôm tơdrong păr jur đơ̆ng năr 19/8.

Hơmŏ, cham gre păr gô pơtơm asong rim năr đei đơ̆ng 36-40 'măng păr tŏk jur, pơtoi hăm pơlei tơm HCM, Hà Nội, Đà Nẵng, Vinh, Cần Thơ păng Hải Phòng. Păr tŏk jur kiơ̆ teh đak đe Đà Lạt - Kuala Lumpur (Malaysia) adoi gô pơkăp 8 'măng păr tŏk jur lơ̆m minh giĕng. Lơ̆m năr pơtơm iŏk yua, Cham gre păr apŭng plenh teh Liên Khương gô asong pơhlom 28 'măng păr tŏk jur.