Hơdrol kơ jơ pơgơ̆r pơih blŭng, Thủ tướng teh đak păng đĭ đăng bơngai Hop akŏm ‘măn pơnĭt kŭp kơ̆l kơ kon pơlei lôch yua đơ̆ng ‘mi kial pơrăm; Khŭl mơdro sa mơlôh Việt Nam ‘măn 6 ti hlak jên tơgŭm hăt hot 6 dêh char Cao Bằng, Hà Tĩnh, Đà Nẵng, Khánh Hoà, Gia Lai, Đắk Lắk hơmet pơ ‘lơ̆ng hiong răm đơ̆ng ‘mi kial pơrăm. Khŭl mơdro sa mơlôh Việt Nam đei dang 21.000 bơngai jang lơ̆m khŭl dôm anih mơdro sa hlôi pơjing tơdrong jang ăn 5 triệu ‘nu bơngai jang, iŏk đei akŏm đĭ đăng jên jang rim sơnăm hloh 40 ti USD păng tơgop hloh 10% GDP teh đak. Kơhrĕng ti hlak jên đei ‘măn ăn dôm tơdrong jang vei lăng sơđơ̆ng tơdrong hơrih sa tơpôl hlôi tơƀôh hơdăh jơhngơ̆m đon iung jang hơdrol yua kơ hơnăp jang tơbôl đơ̆ng khŭl mơdro sa mơlôh...

Hmach chơt hơiă dôm jơnei iŏk đei ‘lơ̆ng đơ̆ng khŭl mơdro sa mơlôh, tơƀôh hơdăh tơdrong hơdrin, jang đei păng tih pran đơ̆ng khŭl Mơdro sa mơlôh Việt Nam, Thủ tướng athei Khŭl mơdro sa mơlôh Việt Nam hơnơ̆ng kơchăng, pơcheh hơgei, chĕp vei, tơklep hơdai păng tơgŭm khŭl mơdro sa mơlôh hơtŏk pran jơhngơ̆m mơlôh, jang tơnăp, jơhngơ̆m đon ‘mêm kơ teh đak, tơdrong joăt joe hơdrĕch hơdrŭng, iung jang hơdrol lơ̆m pơjing tơdrong jang sa, tơplih ‘nao hơgei, tơplih kơsô̆, tơplih rơgoh, iŏk yua kơmăy hơgei lơ̆m pơm tơlĕch, tĕch mơdro; hơnhăk dôm kơjă kăp gĭt hơnăn Việt, tơmam Việt lĕch tơ̆ apŭng plĕnh teh. ‘Măng âu, Thủ tướng athei Khŭl mơdro sa mơlôh Việt Nam tơlĕch jang tơdrong jang pơjei băl (6 hloh) ‘noh: "iung jang hơdrol hloh, pơcheh hơgei hloh, hŭt hơkâu hloh, mĭnh jơhngơ̆m đon hloh, mơ̆t jang hơdai hloh, ‘mêm mơnat hloh”.