Mưh đei kang ƀô̆ păng ƀô̆ đô̆i vei lăng sơlam teh đak năm tơ̆ pơlei pơrô̆ pơrôp pơjing hnam mĭnh dơnơ̆ng dơ̆ng pơlei mĭnh hơnih, pơtho tơbăt jang chŭn na ƀa đak, rong kon tơrong, tơdrong hơrih sa ‘nao kơ kon pơlei hơdrung La Hủ oei lơ̆m pơlei Pha Bu, tơring Pa Ủ, dêh char Lai Châu roi năr roi tơplih. Păng lơ̆m trong jang ‘noh, kră pơlei Ly Xạ Pu jĭ mĭnh lơ̆m dôm bơngai pơm jŭk yŭk trong hơlou. Ưh kơ ‘nhoen tŏ ‘mi kial, ƀok hlôi truh hăm rim ŭnh hnam chă pơtho khan ăn kon pơlei hut tơdrong joăt joe pă trŏ lăp, vei lăng năng tông rơgoh pơlei pơla, vei lăng năng tông tơdrong jang sa, vei lăng trong hơdrơ̆ng sơlam teh đak.“Kăl hơdrin đĭ ai vă pơrô̆ pơtho khan kon pơlei băt, dôm tơdrong yă kiơ gơh jang păng dôm tơdrong yă kiơ ưh kơ gơh jang. Vă pơm sơđơ̆ng tơdrong hơrih sa ăn kon pơlei roi năr roi atŏk tơ iung, kơna ba lăp băt hơdrin đĭ ai pơtho khan ăn kon pơlei jang sa, choh jang sa vă đei phĭ tơtŏ dơnŏ ‘lơ̆ng dơ̆ng kơjăp. Ba lăp băt hơdrin chă pơtho khan ăn kon pơlei hơdrin hloh dơ̆ng.

Đơ̆ng sơnăm 2020 truh dang ei, kră pơlei Ly Xạ Pu hlôi vang iung jang kơhrĕng ‘măng chă pơrô̆ pơrôp pơtho khan tơ̆ rim pơlei groi kông sơlam teh đak. Dôm nơ̆r pơma phăl hơlăng đơ̆ng ƀok hlôi tơgop pơm tơplih jơhngơ̆m đon hlôh vao kơ kon pơlei La Hủ tơ̆ pơlei pơla kơdih.

Dang ei, tơ̆ rim pơlei Pha Bu, Nhú Ma, Vạ Pù dăh mă Tân Biên…, lơ ŭnh hnam hlôi băt jang chŭn na ƀa đak, rong kon tơrong, pơtăm ‘long pơgang, iŏk yoa điên thoăi hơgei vă chă tĕch mơdro tơmam drăm. Đe hơ ioh đei năm hŏk pơhrăm tơ̆ hnam trương, pơma nơ̆r Yuăn. Vă kon pơlei lui păng jang kiơ̆,ŭnh hnam ƀok Pu ling lang pơm jŭk yuk trong hơlou lơ̆m atŏk tơ iung mŭk drăm hăm trong rong rơmo, nhŭng, pơtăm ‘long thảo quả păng sa nhân tím tơ̆ yơ̆p bri.

Jĭ sơ̆ ŭnh hnam dơnuh hloh lơ̆m pơlei, ŭnh hnam ƀok Phàn Lê Sa sơ̆ lăp chă jang sa gơnang lơ̆m tŏ sĕt chŭn na ƀa mĭnh pơyan. Mơ̆ng kiơ̆ păng jang kiơ̆ nơ̆r pơrô̆ đơ̆ng kră pơlei Ly Xạ Pu, ‘nhŏng hlôi tơplih pơtăm ‘long kuê̆, sa nhân tím. Đơ̆ng rŏng mĭnh ƀar sơnăm jang sa hơdrin, hloh 3ha kuê̆, sa nhân hlôi đei iŏk yua, tơgŭm ăn ŭnh hnam yak hloh dơnuh hin.“Mih Pu jĭ bơngai tôch tơnăp, ling lang năm truh tơ̆ pơlei vă hơlêm, tơgŭm djru kon pơlei đơ̆ng tơdrong iĕ ioch truh tơdrong tơnap tap. Mih hơnơ̆ng chă pơtho khan phăl hơlăng ăn kon pơlei dôm tơdrong ‘lơ̆ng păng hơnơ̆ng pơrô̆ pơrôp kon pơlei jang kiơ̆ ‘lơ̆ng rim tơdrong lơ̆m tơpôl. Hơpơi ăn khei năr truh ou kơnh mih pran jăng grăng akou hloh dơ̆ng, hơdrin đĭ ai vă năm tơ̆ pơlei chă pơrô̆, pơtho khan hơnơ̆ng ăn kon pơlei vang băt păng pơm kiơ̆”.

Gơnơm hơdrin đĭ ai đơ̆ng khul kơdră Đảng, Kơdră chĕp pơgơ̆r tơring păng dôm bơngai đei kon pơlei lui yom nhen kră pơlei Ly Xạ Pu, ŭnh hnam dơnuh kơ tơring tơjur pă vă jê̆ 64%; tơring jei hlôi jang keh đang 7 lơ̆m 19 trong tơlĕch jang tơ iung pơjing tơring tơrang ‘nao.

Ưh khan lăp bơngai đei kon pơlei lui yom, ƀok Ly Xạ Pu  oei jing gơng tơroh kloh klĕch ƀar păh khul kơdră đảng, kơdră chĕp pơgơ̆r kơ tơring hăm kon pơlei, atŭm hăm khul ƀô̆ đô̆i vei lăng sơlam teh đak vei kơjăp sơđơ̆ng dơ̆ng kơjăp tơdrong pơm tơm tơring sơlam teh đak. Ƀok Đao Văn Thức, Kơ iĕng Kơdră chĕp pơgơ̆r Jơnŭm vei lăng kon pơlei tơring Pa Ủ, dêh char Lai Châu tơbăt:“Ƀok Ly Xạ Pu jĭ bơngai tôch tơnăp lơ̆m pơrô̆ pơrô̆ pơtho khan ăn kon pơlei sơđơ̆ng hơrih sa; pơrô̆ pơtho khan kon pơlei vei lăng rơgoh pơlei pơla, atŏk tơ iung mŭk drăm. Ŭnh hnam ƀok jei jĭ mĭnh ŭnh hnam pơm jŭk yŭk trong hơlou, atŏk tơ iung rong rơmo, nhŭng. Dang ei ƀok tŏk bŏk hơnơ̆ng chă pơrô̆ pơtho khan kon pơlei tơplih đơ̆ng jang sa iŏk đei ưh kơ lơ, vă pơtăm ‘long đei iŏk yoa kơjăp vă atŏk tơ iung mŭk drăm”.

Lơ̆m hloh 70 sơnăm, mă đơ̆ng jơhngơ̆m jăn pă gan pran jăng nhen sơ̆, mă lei kră pơlei Ly Xạ Pu oei prăt năr hơngŭr chă yak năm rim pơlei, pơma dơnuh pơtho khan ăn kon pơlei dôm tơdrong ‘lơ̆ng, hơ iă kơ trong bơ̆ jang đơ̆ng teh đak; pơrô̆ pơrôp, pơtho khan ăn kon pơlei pơnam jang sa, vei lăng bri, vei lăng pơlei, vei lăng sơlam Teh đak. Prăt jơhnơr lăng tông nông gia kon pơlei, bơngai đang viên hơdrung La Hủ ‘noh tŏk bŏk hơngŭr hŏk pơhrăm păng jang kiơ̆ nơ̆r Ƀok Hô hăm dôm tơdrong jang hơdăh. Nhen lĕ pra ŭnh ling lang khơ̆ng bơblông tŏk bŏk groi kông sơlam teh đak, ƀok tŏk bŏk tơ̆k hơdăh ăn jơhngơ̆m đon lui yom dôm pơlei pơla La Hủ tơ̆ tơring Pơmơ̆t kơ Teh đak.