Tôm trong pơhlŭ kơnê̆ lơ̆m mạng

Luơ̆t sư Ngô Huỳnh Phương Thảo – Khul jang luơ̆t sư pơlei tơm HCM tơroi, ‘nao âu minh ‘nu boăl kơ yă đei tai khuan jên mong lơ̆m mạng ƀơm đe pơhlŭ thoi âu. Đe sư pơhlŭ yă âu pơma dơnuh hăm clip lơ̆m Facebook, rim ‘măng like 1 tơmam drăm kiơ noh đei kla 10.000 hlj. Đơ̆ng rŏng kơ noh athei bơngai ƀơm pơhlŭ kla jên rŏng ‘ngir rŏng ‘ngir, hơkŏp kơsô̆ jên hiong truh 25 tih hlj. Mă bơngai âu hlôi tơkêng truh anih jang kŏng an, mă lei kơyuơ kơmăi tơm kơ tai khuan gah pơhlŭ tơ̆ Campuchia noh tơnap iŏk tơvih jên. Luơ̆t sư Thảo akhan, ah tơmoi ƀơm pơhlŭ, ngân hang athei jang kơjăp hăm dôm anih jang kơpal păng dôm anih jang mong jên nai dah sek tơlang tơtenh, mưh ưh noh jên gô đei asong ăn lơ tai khuan păng đe iŏk jên. Luơ̆t sư Ngô Huỳnh Phương Thảo pơtruh nơ̆r: (Đe sư athei jang hăm dôm anih jang kơpal pơvei tai khuan noh vă tang găn răm păng sek tơlang kiơ̆ ƀlep khôi luơ̆t. Dah mă jang atŭm hăm dôm anih mong jên nai đei tơrĕk tơ̆ Việt Nam, pơvei hloi tai khuan đei kơsô̆ jên mă bơngai đe sư pơhlŭ pơtruh ăn)

Kiơ̆ bơngai juăt jang gah kŏng ngê̆ thŏng tin, dang ei, dôm tơdrong pơhlŭ kơnê̆ noh hơgei kloh klĕch hloi, iŏk yua kơmăi kơmŏk ‘nao. Kơyuơ noh, ưh hơdrô̆ hăm bơngai ‘lŏ sơnăm, ưh kơ băt kloh klĕch gah kŏng gnê̆ thŏng tin ‘nao ƀơm đe pơhlŭ mă kơtă hăm bơngai mơlôh, hlôh vao kloh klĕch gah tơdrong âu adoi ƀơm đe sư pơhlŭ pơjĭp đơ̆ng khul kơnê̆. Hơdah noh khei năr tơjê̆ âu đei minh trong pơhlŭ pơjĭp ‘nao, khul kơnê̆ iŏk sơnong gơh jang (Accessibility) lơ̆m ư̆ng yŭng điê̆n thoăi, đơ̆ng noh tơtông kơtơ̆ng ang băt tôm gah mât khâu, mã PIN, OTP, đang kơ noh iŏk kơmăi kơdâu đơ̆ng hơtaih, iŏk pơđĭ jên lơ̆m tai khuan kơ bơngai yua lơ̆m minh ƀar pơnĭt đĕch. Kơsô̆ jên ƀơm pơhlŭ pơjĭp tŏk truh kơ hrĕng tih hlj.

Anih tơm Kŏng an tơroi lơ̆m khei năr truh, tơdrong pơm glăi yua kŏng ngê̆ kao gô pơtoi ƀôh lơ. Dôm anih mong jên păng tơmoi đei tai khuan jên gơih pơtoi jing anih mă đe sư hnhoi truh. Thượng tá Cao Việt Hùng, Phŏ kơdră Phŏng 4, Anih tơm jang vei sơđơ̆ng mạng, tang găn păng tơjră tơdrong pơm yoch glăi yua kŏng ngê̆ kao (A05) lơ̆m Anih tơm Kŏng an ăn tơbăt, khei năr tơjê̆ âu lơ bơngai yua  kŏng ngê̆ AI vă pơhlŭ pơjĭp, krao facetime vă mơng jên, pơm yah nơ̆r pơma păng muh măt. Hăm tơdrong âu, khei năr truh, anih jang kơpal gô hơtŏk jang hadoi hăm dôm anih jang đei tơrĕk hơmet sim ưh đei chih hơnăn tơm yua păng tai khuan ưh đei tơm dơnơm, tang găn đei tơdrong pơhlŭ pơjĭp jên hu đe:  (Athei hơtŏk jang atŭm hăm Ngân hang Teh đak, Anih tơm Kŏng an păng dôm anih jang kơpal kla jên kiơ̆ trong âu athei pơjing tơdrong jang hadoi vă tang găn iŏk yua tai khuan ngân hang điê̆n tưh ưh đei tơm dơnơm. Vă pơm tơdrong âu noh đei 2 tơdrong kăl jang, kơlih sim ưh tơm dơnơm noh tôm tơroh hăm yư lĭu teh đak păng anih oei xa kơ kon pơlei, oei tai khuan ưh đei tơm dơnơm noh bơ̆n jang thim minh hơyak dơ̆ng noh tơdrong jang hơlen đơ̆ng rŏng)

"3 ưh" vă vei lăng kơdih po

Tơ̆ Anih mong jên Á Châu (ACB), hăm tơdrong pơhlŭ pơjĭp tai khuan kiơ̆ mạng hăm kŏng ngê̆ kao roi năr roi kloh klĕch, ƀok Từ Tiến Phát, Kơdră dơnơm ACB ăn tơbăt, anih jang âu akŏm lơ̆m dôm trong jang nhen: tang găn păng tơjră, sek tơlang tenh dôm tơmoi mă ƀơm đe pơhlŭ pơjĭp jên. Anih mong jên hlôi jang atŭm hăm Anih tơm Kŏng an păng Anih tơm Kŏng ngê̆ thŏng tin đei dôm trong jang hơdah vă tang găn dôm tơdrong pơhlŭ pơjĭp ‘nao hăm dôm tơmam drăm tơroi ăn bơngai yua tai khuan ah năm jang mă ƀơm sar bar:  (Nhôn đei trong vă ƀôh băt hrôih dôm link yah lê̆ nhôn tang găn. Ah đei ƀôh link yah hơnăn kơ anih mong jên noh nhôn pơtruh tin nhăn SMS ăn tơmoi hloi. Nhôn pơtruh tin nhăn hăm tơdrong noh tơmoi tŏk bŏk oei mơ̆t đăng nhâ̆p ah minh kơmăi chrih, mưh tơmoi pơtoi pơm kiơ̆ ‘noh tơkhuă mă hơtuch đĭ đăng pơih tai khuan kơtuh mam tơmoi noh mã OTP, nhôn kai dơ̆ng minh nơ̆r kăp gĭt vă tơroi ăn tơmoi băt: Mih ma duch nă athei kơchăng âu jing tơdrong pơma dơnuh gah jên hu).

Hăm tơdrong pơhlŭ pơjĭp hăm kŏng ngê̆ kao kloh klĕch nhen dang ei, lơ bơngai juăt jang gah kŏng ngê̆ păng anih mong jên tơroi hăm bơngai yua athei vei vêr po hăm trong "3 ưh": ưh đei mơ̆t lơ̆m link ưh kơ juăt, ưh đei yua app chrih, ưh đei mơ̆ng kiơ̆ nơ̆r pơkăl ưh kơ juăt.

Kiơ̆ kơ ƀok Ngô Tấn Vũ Khanh – kơdră dơnơm kơ teh đak anih jang Kaspersky tơ̆ Việt Nam, dang ei dôm anih mong jên adoi đei tôm trong vă vei sơđơ̆ng kơmăi đơ̆ng tơdrong iŏk yua păng vei sơđơ̆ng hăm tơdrong jang jên hu hăm tơmoi. Mă lei, bơngai yua mă hơtuch đĭ đăng athei băt hơdah sơđơ̆ng pơhlôh vă tang găn păng tơjră dôm tơdrong pơhlŭ pơjĭp ‘nao dang ei: (Tơdrong mă hơtuch đĭ đăng noh tơmoi yua mă lei tơdrong tang găn dôm tơdrong pơhlŭ pơjĭp âu noh gah hlôh vao, kŏng ngê̆ noh mă anih mong jên đei trong jang kŏng ngê̆ ‘lơ̆ng kơjăp thoi yơ mă tơmoi yua kơ po ƀơm đe pơhlŭ pơjĭp adoi tơnap mơ̆n. Kơyuơ noh, dôm anih mong jên athei hŏk trong jang đơ̆ng dôm anih mong jên tih pran lơ̆m kơpal teh kiơ̆ dôm kơmăi kơmŏk kơjăp sơđơ̆ng vă vei vêr dơh po păng ăn tơmoi yua tai khuan anih mong jên po)

Vă tơjră hăm tơdrong pơm glăi kŏng ngê̆ kao, kơdih po bơngai yua tai khuan anih mong jên lơ̆m mạng athei đei tơroi tơbăt lơ hloh dơ̆ng, hơnơ̆ng chih akŏm tơdrong hlôh vao ‘nao, băt hơdah tơdrong pơhlŭ pơjĭp đơ̆ng khul pơm kơnê̆ vă kơdih đei trong vei vêr dơh po hăm dôm tơdrong pơhlŭ pơjĭp kơnê̆.