VOV4.Bahnar – Pơgê năr 8/4, Anih jang Kơpal plei tơm, Anih vei lăng kon pơlei plei tơm Cần Thơ hlôi pơgơ̆r hop akŏm dôm kơdră pơgơ̆r khop phâ̆t, bơngai hŏk kơjung păng Jơnŭm pơgơ̆r dôm hnam chua Phâ̆t yăo Nam tông Khmer, bơngai đei kon pơlei lui yom lơ̆m tơring kơ plei tơm Cần Thơ vă thơ thâu Têt juăt jue Chôl Chnăm Thmây păng tơroi găh tơdrong jang kon kông xơnăm 2021, xơkơ̆t truh xơnăm 2022. Xơnăm 2021 jing xơnăm ƀơm lơ tơnap tap kơyuơ răm đơ̆ng 'mi kial, pơrang jĭ Covid -19 mă lei plei tơm Cần Thơ hlôi axong bơngai jang vă jang lơ tơdrong jang tih vă dôm tơdrong pơkăp jang kon kông đei pơm jang tôm tong, tơnăp. Dang ei, plei tơm tŏk bŏk oei akŏm hơmet tơlĕch jang hơtŏk mŭk drăm, joh ayŏ, tơpôl vă hơtŏk plei tơm Cần Thơ; iŏk jang kiơ̆ Pơkăp kơ teh đak găh hơtŏk mŭk drăm – tơpôl tơring kon kông păng groi kông jăl xơnăm 2021 - 2030, duh nhen trong jang kon kông jăl xơnăm  2021 - 2030, xơkơ̆t truh xơnăm 2045. 'Nâu jing trong jang tih vă dôm tơring kĕ đei trong vei lăng, hơtŏk tơdrong erih ăn kon pơlei kon kông.

Lan chih păng pơre nơ̆r