Hlơ hlĕng ƀât ‘năr tŏ tôch dêh lơ̆m khei 7 tơ̆ groi teh Đồng Xuân, găh Hơlĕch dêh char Đắk Lắk, vă jê̆ 30 ‘nu kăn ƀô̆, linh kơ Anih chĕp kơ̆l pơgơ̆r khul linh dêh char, khul linh dân quân kŭm hăm đe ƀak si pháp y oei hơnơ̆ng bơ̆ jang sir chă tơ̆ dôm pơsat linh lôch tang ăn teh đak tam mă băt hơnăn tơ̆ pơsat linh Xuân Quang 2. Lơ̆m jơnăr âu mơ̆n, 1 khul jang nai oei iŏk akŏm dôm kơmẫu tơmam tơ̆ pơsat linh La Hai. Rim pơsat linh đei sir pơih dơ̆ng tôch hơlen, hăm ƀĕnh jơhngâm đon kŭp yom, yoa bu bu kŭm hlŏh akhan, lăp 1 kơmẫu ADN oei đei dơ̆ng đĕch gơ̆h pơih đei tơdrong ‘lơ̆ng vă hơnhăk 1 ‘nu kon kơ teh đak vih dơ̆ng hăm unh hnam đơ̆ng rŏng dôm jĭt sơnăm.

Hăm Trung tá Lê Nam Ninh, Bơngai jang tơgŭm ăn lăm jang tơgŭm, Anih jang chinh trĭ, kơ Anih chĕp kơ̆l pơgơ̆r khul linh dêh char Đắk Lắk, ‘măng năm bơ̆ jang âu hơnhăk ba lơ tơdrong tôch kăp gĭt. Hơdai hăm bơ̆ jang tơdrong jang đei pơjao, ‘nhŏng oei hơnhăk ba đon hơmĕng đơ̆ng lơ sơnăm kơ dôm unh hnam, tơchă dơ̆ng pơsat ƀok hlôi lôch tang lơ̆m tơdrong tơblăh, kŭm jing tơdrong hơpơi ‘mĕh mă hơtuch đơ̆ng mĕ kơdih.

Trung tá Lê Nam Ninh tơroi: "’Nhŏng oh lơ̆m khul hlôh vao kơjăp, pơjao tơdrong jang ăn rim bơngai vă hơtŏk tôch ai đon jang tơnăp. Jang đĭ hơnăp hăm ƀĕnh jơhngâm đon ‘mêm băt. Kơdih kâu inh, lơ̆m ‘măng năm bơ̆ jang mă âu kŭm hơmĕng chă ƀôh ƀok inh ‘năi."

Dang ei, tơ̆ 34 pơsat linh lơ̆m dêh char Đắk Lắk, oei đei hlŏh 4.100 tŏ pơsat tam mă đei hơnăn. Kŭm jing rơbâu unh hnam oei hơnơ̆ng gô chang 1 năr yơ ‘nŏh gơ̆h băt anih oei ƀŭ hơmet kơtum kơtŏng ‘nhŏng oh kơdih. Đơ̆ng đon gô chang ‘nŏh hlôi pơjing đei jơhngâm pran vă đe kăn ƀô̆, linh păng khul juăt jang adrin bơ̆ jang, mă ‘năr tŏ hang dăh mă năr pơdơ̆h.

Mă lei, tơdrong jang năm chă dơ̆ng hơnăn ăn đe ‘nhŏng ưh kơsĭ lai yơ kŭm ƀônh hiôk. Đơ̆ng rŏng dôm jĭt sơnăm, lơ pơsat đĭ jing teh hoh, kơting bŭk ôm nhen pă đei kiơ kơna ưh iŏk đei kơmẫu kơting vă set hơlen ADN.

Tơ̆ pơsat linh La Hai, khul jang sir chă tơ̆ 27 pơsat linh mă lei lăp đei 6 pơsat linh oei iŏk đei kơmẫu, oei 21 tŏ pơsat nai ưh pă iŏk đei kơting yơ vă set hơlen bơih. Tơdrong ‘nŏh vă akhan, oei đei lơ pơsat linh lôch tang ăn teh đak gô ưh gơ̆h kơbăt hơnăn.

Ƀak si Hồ Kim Thi, Anih jang Pháp y dêh char Đắk Lắk ăn tơbăt, vă rim kơmẫu kơting linh đei kôch iŏk gơ̆h set hơlen ADN, rim tơdrong jang athei bơ̆ jang mă ‘lơ̆ng: "Lơ̆m tơdrong hơmet kơmẫu kơting đei bơ̆ jang tôch hơlen, ưh gơ̆h bơ̆ jang hăt hot, chă iŏk kư̆ kă. Yoa mưh iŏk kơmẫu đĭ tôch pơmat bơih kơna athei bơ̆ jang mă ‘lơ̆ng. Vă gơ̆h hơmĕng chă đei dơ̆ng hơnăn ăn đe linh hlôi lôch tang ăn teh đak.”

Anih chĕp kơ̆l pơgơ̆r khul linh dêh char Đắk Lắk hlôi jang đang tơdrong chă iŏk kơmẫu tơ̆ Pơsat linh La Hai. Dang ei anih jang oei ăn 2 khul năm bơ̆jang tơ̆ Pơsat linh Xuân Sơn Nam păng Pơsat linh Xuân Phước, xăh Đồng Xuân.

Truh dang ei, khul jang hlôi sir chă tơ̆ 280 lơ̆m 4.019 tŏ pơsat linh lôch tang ăn teh đak; iŏk đei 105 kơmẫu kơting gơ̆h set hơlen ADN, oei đei 175 tŏ pơsat ‘nŏh ưh iŏk đei kơmẫu kiơ.

Hơdai hăm ‘nŏh, Khul K51 jang hơdoi hăm dôm tơring dăr hơlen, chih iŏk nơ̆r tơroi tơ̆ 8 lơ̆m kơsô̆ 102 xăh; sơng iŏk nơ̆r tơroi găh 4 tơdrong kơtơ̆ng ang găh linh lôch tang ăn teh đak; sir iŏk đei 4 kơ̆l linh lôch tang ăn teh đak, dang ei oei tam mă băt hơdăh hơnăn.

Kiơ̆ trong jang, đơ̆ng dang ei truh ‘năr 11/10/2026, tơdrong sir chă, iŏk kơmẫu tơ̆ dôm pơsat linh oei đei dơ̆ng tơ̆ dêh char gô đei bơ̆ jang hơnơ̆ng, adrin jang đang tơdrong iŏk kơmẫu ADN adrol kơ ‘nŏh 31/10/2026. Ƀok Đào Mỹ, Phŏ Kơdră vei lăng kon pơlei dêh char Đắk Lắk ăn tơbăt: “Nhôn oei hơtŏk tơdrong jang 500 măng năr chih hơdăh hơnăn đe linh lôch tang ăn teh đak. Nhôn oei hơlen năng rim trong jang vă pơgơ̆r pơjao tơdrong jang, klăih song tơdrong jang mă hơdăh, pơm ‘lơ̆ng rim tơdrong vă truh ‘năr 31/10/2026 ‘nŏh jang đang tơdrong sir kôch pơsat linh vă iŏk kơmẫu. Păng oei adrin hơtŏk tơdrong sir chă kơting linh lôch tang ăn teh đak lơ̆m teh đak, kŭm nhen adrin tơlĕch trong jang vă hơtŏk jơhngâm năm sir chă tơ̆ Campuchia."

Tơdrong jang 500 măng năr ưh lăp pơjei hăm jơnăr vă iŏk ‘măn răk ADN oei đei dơ̆ng đĕch, mă oei jing tơdrong jang đei ƀĕnh jơhngâm đon ‘mêm băt "Nhă đak ƀlŏk kơtu", đon tơnăp đơ̆ng jơhnơr hrei ‘nâu hăm dôm bơngai hlôi lôch hŭt hơkâu yoa tơdrong rơngei hiôk hian kơ teh đak. Rim pơsat linh đei pơih dơ̆ng bong, rim kơmẫu kơting đei iŏk akŏm sư tưk tơiung dơ̆ng đon hơmĕng gô đei dơ̆ng lơ linh lôch tang ăn teh đak đei krao trŏ hơnăn kơdih, đei pơlei pơla, đei unh hnam, vă đơ̆ng rŏng kơ băt dôm yơ sơnăm gô chang, đe ‘nhŏng gơ̆h vih dơ̆ng lơ̆m tơpang ti kơtum kơtŏng ‘nhŏng oh, lơ̆m jơhngâm đon ‘mêm băt đơ̆ng mĭnh teh đak kơjăp ‘lơ̆ng./.