Dêh char Lâm Đồng jang hơdoi hăm Hnam hŏk Chính trị quốc gia Hồ Chí Minh pơgơ̆r Hop akŏm pơma nuh khoa hŏk “Trong jang tŏk dêh char Lâm Đồng: Tơdrong 'lơ̆ng păng tŏk pran”. Đơ̆ng rŏng kơ hơmet ming anih vei lăng, dêh char Lâm Đồng đei lơ tơdrong 'lơ̆ng vă jang tŏk. Tơring đei teh xă đơ̆ng bri kông truh tơ̆ tơring tơter đak dơsĭ, đei cham char, tơring choh jang xa hăm kơmăy kơmŏk rơgei, chă tơmang lăng, unh hơyuh, tơmam khoáng sản kŭm hăm lơ tơdrong joh ayŏ kơ dŏ xoang 'lơ̆ng hơiă. 'Nâu jĭ tơdrong 'lơ̆ng vă pơjing lơ anih jang mŭk drăm, jơhngâm pran vă jang tŏk 'nao păng tơguăt kơjăp tơring. Mă lei, tơring oei tơjră hăm lơ tơdrong nol nhen anih jang, trong nơnăm tam mă gan 'lơ̆ng, tơguăt tơring tam mă pran, tơdrong jang mŭk drăm tam mă tơgăl hăm tơdrong 'lơ̆ng, khul bơngai jang păng đon tơplih 'nao rơgei tam mă pơm lăp hăm tơdrong 'mĕh vă.  

Pơma tơ̆ hop akŏm, ƀok Y Thanh Hà Niê Kđăm, Kơdră jang lơ̆m Trung ương Đảng, Bí thư Đảng dêh char Lâm Đồng akhan, dôm trong jang tŏk so sơ̆ pă kĕ tŏk pran bơih, kơna athei Lâm Đồng chă trong akŏm jơhngâm pran, jang tŏk ‘nao păng tơplih ming đon tơchĕng ‘nao mă lăp hăm trong tơplih hăm kơmăy sô̆ păng jang tŏk rơgŏh ‘lơ̆ng:

“Dêh char kăl đei jơ hngâm pran ‘vă jang tŏk’ ‘nao, mĭnh đon tơchĕng plơ̆ng vă pơm tơplih anih dơ̆ng đơ̆ng Lâm Đồng lơ̆m teh đak păng tơ̆ tơring. Kơlih thoi noh, Hop akŏm khoa hŏk ưh lăp vă bơ̆n hơlen năng dôm tơdrong hlôi jang đei đĕch mă kăl hlŏh dơ̆ng ‘nŏh jĭ anih vă bơ̆n chă pơma nuh tơpăt kiơ̆ khoa hŏk păng yăn âu vă chă dôm trong jang pran ‘lơ̆ng, pơm kiơ̆ tơdrong ‘mĕh vă jang tŏk đơ̆ng Lâm Đồng lơ̆m chăl ‘nao”.

Phó Giáo sư, Tiến sĩ Đoàn Minh Huấn, Kơdră jang lơ̆m Anih tơm Chinh trĭ, Kơdră chĕp kơ̆l Hnam hŏk Chính trị quốc gia Hồ Chí Minh pơma hơdăh, Lâm Đồng oei đei lơ tơdrong ‘lơ̆ng găh cham char bri brăh, choh jang xa hăm kơmăy kơmŏk ‘nao, unh hơyuh rơgoh, tơmam khoáng sản păng chă tơmam lăng. ‘Nâu jĭ dôm tơdrong kăl vă dêh char atŏk tơiung dôm trong jang mŭk drăm rơgoh, mŭk drăm hơdoi kơjăp ‘lơ̆ng, mŭk drăm đak dơsĭ păng dôm anih jang kơmăy pơm tơmam ‘lơ̆ng.

“Hop akŏm pơma nuh dôm trong jang, tơdrong tơgŭm hơdrô̆ vă pơjing jơhngâm  pran ăn tơdrong jang tŏk păng tưk tơiung hơnăp jang đơ̆ng dôm anih jang mŭk drăm, mă loi jĭ anih jang mŭk drăm kơdih lơ̆m tơdrong tơplih ‘nao trong jang tŏk đơ̆ng Lâm Đồng. Hue lăng truh tơdrong pơm ‘lơ̆ng ăn tơdrong jang tŏk truh 2 kơsô̆, lơ̆m noh athei pơm hơdăh dôm tơdrong klăih song hơnăp jang, hơmet pơ ‘lơ̆ng anih tơmât jên jang, tĕch mơdro, hơtŏk tơdrong ‘lơ̆ng mưh chĕp kơ̆l pơgơ̆r păng đei yoa mưh vei lăng jang tŏk”./.