Mă lei, tơdrong jang iŏk teh, ăn oei tơ̆ plei hle păng pơgơ̆r bơ̆jang kiơ̆ tơdrong jang oei jing hơnih tơhlăk tih ƀơm ưh kơ ‘lơ̆ng truh tơdrong tơmơ̆t jên jang păng tŏk mŭk drăm. Vă jang đang tơdrong hơgăt GRDP 6 khei blŭng sơnăm tŏk tŏ sĕt tôch ai 9,1%, Kơdră Anih vei lăng kon pơlei dêh char Khánh Hòa Nguyễn Việt Hùng athei rim anih jang păng tơring akŏm hơmet pơ ‘lơ̆ng mơmat tat ăn anih mơdro sa, pơih să anih tĕch mơdro, pơtrŭt pơm tơlĕch kơmăy kơmŏk, hơtŏk tôch ai kŏng suơ̆t dôm hnam kơmăy ŭnh điên păng tŭn rĕnh dôm tơdrong jang tơm.

Dêh char kŭm athei akŏm jên jang ăn tơdrong jang iŏk teh, ăn oei tơ̆ plei hle, tơmơ̆t jên jang păng tơlĕch jên tơmơ̆t jang kơ teh đak, mă loi ‘noh jĭ dôm tơdrong jang trong nơnăm, tơdrong jang ‘lơ̆ng păng dôm hơnih oei hle.