Ƀar Kơdră chĕp kơ̆l pơma hơdăh Việt Nam păng Timor-Leste đei lơ tơmam ‘lơ̆ng vă pơih să jang hơdai yua kơ tơdrong đei yua kơ kon pơlei 2 teh đak păng tơgop ăn tơdrong rơngei, hơtŏk tơiung kơjăp kơ tơring. 2 păh drơ̆ng nơ̆r hơnơ̆ng hơmet ming tơdrong lui ngeh chĭnh trĭ, hơtŏk loi dơ̆ng pơma dơnuh đơ̆ng khŭl kơdră kơpal, tơlĕch jang đei yua dôm tơdrong drơ̆ng nơ̆r hlôi kĭ pơkăp.

Găh mŭk drăm, 2 teh đak gô pơtrŭt jăh kĭ ăn păng pơm kiơ̆ Tơdrong tơchơ̆t tĕch mơdro 2 pang, hơdai hăm pơih să jang hơdai lơ̆m rim tơdrong jang phe, tơmam đơ̆ng choh jang sa, ka hơdang, tanh chơ choh, viễn thông, tơplih kơsô̆, anih jang kăl păng pơvih pơvăn. Thủ tướng Timor-Leste athei Việt Nam hơnơ̆ng pơtruh dôm tơmam ‘lơ̆ng, mă loi ‘noh jĭ phe, tơgop vei sơđơ̆ng phe sŏng ăn teh đak ‘nâu. 2 păh kŭm drơ̆ng nơ̆r hơtŏk loi dơ̆ng jang hơdai khŭl lĭnh, pơtho pơhrăm bơngai jang, joh ayŏ, chă tơmang lăng, tơplŏng kơdâu păng tơroi băl tơdrong hlôh vao hơtŏk tơiung choh jang sa kơjăp.