Kiơ̆ tơdrong tơproh jang, tơdrong jang đei teh xă dang 200ha, akŏm đĭ đăng jên jang 139 ti hlak jên păng gô đei tơlĕch jang kiơ̆ jăl lăp hăm tơdrong gơ̆h tơmât jên jang kŭm nhen dôm tơdrong đei tơ̆ yăn âu. Kiơ̆ tơ ‘ngla tơmât jên jang, tơdrong jang vă pơjing trong pơtăm păng pơm hơmet tơmam pơgang ‘lơ̆ng, tơmât yoa kơmăy kơmŏk ‘nao vă pơjing dôm tơmam lăp hăm tơdrong hơgăt ‘lơ̆ng păng tơdrong ‘mĕh vă tơ̆ anih tĕch mơdro.

Ƀok Lê Minh Thông, Kơdră vei lăng kon pơlei xăh Vĩnh Thạnh ăn tơbăt, Đan Sâm jĭ kơloăi ‘long pơgang đei kơjă kăp gĭt, đei yoa lơ lơ̆m y học cổ truyền păng đei lơ tơdrong ‘lơ̆ng vă jang tŏk: “Tơdrong jang ‘nâu hăm tơring, pơih đei lơ tơdrong ‘lơ̆ng ‘nao vă tơplih ming ‘long pơtăm đơ̆ng choh jang xa hmă jing choh jang xa hăm kơmăy kơmŏk, tơklep hăm pơm hơmet tơmam, trong jang xa đơ̆ng anih tĕch mơdro păng kon pơlei. Kiơ̆ đơ̆ng noh chă đei tơdrong jang sơđơ̆ng ‘lơ̆ng tơ̆ tơring.”

Ƀok Lê Quang Hùng, Kơdră Anih vei lăng jang pơgang dêh char Gia Lai ăn tơbăt, Tơdrong tơchơ̆t kơsô̆ 72 đơ̆ng Anih tơm Chinh trĭ păng trong jang kơsô̆ 06 đơ̆ng Anih chĕp kơ̆l Đảng dêh char Gia Lai găh atŏk tơiung anih jang pơgang đơ̆ng 2026-2030 chih hơdăh, atŏk tơiung 'long pơgang jĭ 1 lơ̆m dôm tơdrong vă pơ 'nhŏ jang hơdrol. Yoa thoi noh, tơdrong tơlĕch trong pơtăm 'long pơgang tơ̆ Vĩnh Thạnh lăp hăm trong jang atŏk tơiung đơ̆ng Gia Lai păng trong vă jang atŭm kơ teh đak.

“’Long Đan Sâm jĭ kơloăi ‘long pơgang tôch kăp gĭt păng hơnhăk ba đei yoa lơ ăn jơhngâm pran. Hrei ‘nâu lơ̆m apŭng plenh teh, lơ teh đak iŏk yoa sư vă hơmet dôm tơdrong jĭ găh plei nuih, hơmet ăn drŏ kăn đơ̆ng rŏng kơ rơneh. ‘Nâu kŭm jing tơdrong jang mă blŭng tơ̆ Việt Nam pơtăm Đan Sâm lơ̆m teh tôch xă. Kon pơlei Vĩnh Thạnh kŭm gô đei xa yoa đơ̆ng tơring pơtăm âu ‘năi”.

Tơdrong tơlĕch jang pơtăm păng pơm hơmet pơgang đơ̆ng Đan Sâm tơ̆ xăh Vĩnh Thạnh, dêh char Gia Lai gô tơgop iŏk yoa ‘lơ̆ng dôm tơdrong ‘lơ̆ng đơ̆ng ‘long pơgang tơ̆ tơring. Kiơ̆ đơ̆ng noh, pơjing jơhngâm pran vă jang atŏk tơiung mŭk drăm, chă tơdrong jang, dăr deh pơjing đei kơjă kăp gĭt đơ̆ng ‘long pơgang tơklep hăm đon pơhnŏng jang tŏk anih jang pơgang păng choh jang xa hăm kơmăy kơmŏk ‘nao ‘lơ̆ng đơ̆ng Gia Lai.