‘Măng pơgơ̆r pơih blŭng đei tơdrong vang akŏm đơ̆ng Thủ tướng Lê Minh Hưng, Thủ tướng kơ 4 teh đak ASEAN ‘noh đei: Thủ tướng Lào Sonexay Siphandone, Thủ tướng Campuchia Hun Manet, Thủ tướng Thái Lan Anutin Charnvirakul păng Thủ tướng Timor-Leste Kay Rala Xanana Gusmão. Tơ̆ Hop akŏm, Thủ tướng Lê Minh Hưng pơtơm blŭng hăm 1 nơ̆r apĭnh ‘noh jĭ lơ̆m 1 apŭng plĕnh teh tŏk bŏk tơplih gĭt kăl, tơdrong tơlĕch ăn năr ‘nâu ưh khan lăp ASEAN gô pơm lăp đei liơ, mă ASEAN gô pơjing trong thoi yơ ăn tơ̆ hơnăp kơnh đơ̆ng kơdih bơ̆n lơ̆m a nglŏ 21? Roi tơƀăt 59 sơnăm pơjing păng hơtŏk tơiung, Thủ tướng pơma hơdăh ‘noh jĭ tơdrong jang pơjing tơdrong ‘lơ̆ng kơ ASEAN păng akhan dôm jĭt sơnăm truh âu kơnh gô jing tơdrong jang pơjing trong tơ̆ hơnăp kơnh kơ ASEAN lơ̆m 1 apŭng plĕnh teh mă kơmăy kơmŏk tŏk bŏk tơbăt dơ̆ng iŏk yua, chih răk tơdrong chĕp kơ̆l păng tơplih rơgoh tŏk bŏk tơbăt tơdrong jang hơtŏk tơiung.

Tơƀôh hơdăh kơjă tih hloh đơ̆ng ASEAN lơ̆m dôm jĭt sơnăm truh gô tơƀôh hơdăh akhan 1 tơpôl tơgoăt pôm ƀơ̆r đon păng yak tŏk kơdih kĕ vang pơjing trong ‘lơ̆ng ăn tơdrong rơngei, jang hơdai păng hơtŏk tơiung kơ tơring păng apŭng plĕnh teh...  Thủ tướng pơma hơdăh: Việt Nam pơkăp hơnơ̆ng vang yak hơdai hăm ASEAN hăm hơpơi ‘meh pơjing đei tơ̆ hơnăp kơnh, yua kơ tơ̆ hơnăp kơnh kơ Việt Nam tơklep hăm tơ̆ hơnăp kơnh kơ ASEAN kŭm nhen tơklep hơdai hăm rơngei, sơđơ̆ng păng hơnŭk hơnoa atŭm kơ pơđĭ tơring.