Pôk bơnê kơ dôm tơdrong tơgop kăp gĭt đơ̆ng Jơnŭm jang lơ̆m jăl jang 2021-2026, mă kăl noh lơ̆m sơkơ̆t pơtôch 40 sơnăm jang tơplih 'nao, chih akŏm Hla bar kăp gĭt ăn Hop akŏm mă 14, Tổng Bí thư, Kơdră teh đak bơ̆n Tô Lâm sơkơ̆t hơdah, Jơnŭm jang hlôi tơplih 'nao trong pơm jang, tơguăt kơjăp hăm sơnong jang chinh trĭ, pơtơm lơ̆m dôm tơdrong jang tih, tơdrong jang tơnap tap, pơvih tơtom ăn Ƀan châ̆p hanh Trung ương, Hơnih tơm Chinh trĭ, Ƀan Ƀĭ thư. Ră hơdah, tơdrong jang chih nơ̆r pơma xa noh kăp gĭt lơ̆m tơdrong jang kăch mạng, Tổng Bí thư, Kơdră teh đak bơ̆n Tô Lâm pơgơ̆r hăm Jơnŭm jang kăl hơlen hơdah hloh gah chu nghia xah hô̆i, trong jang vă tŏk jang chu nghia xah hô̆i tơ̆ Việt Nam lơ̆m khei năr đei lơ tơplih lơ̆m tơpôl.

Athei mă kơchăng hloh, hơbĕch hơbal hloh, tơsŭl tơsăl 'nao lơ̆m jang hơtŏk tơ-iung, kiơ̆ đơ̆ng noh tơroi tơtom, tơnăp ăn dôm tơchơ̆t kơ Đảng. Ƀơ̆t 'măng ou, Tổng Bí thư, Kơdră teh đak bơ̆n Tô Lâm adoi pơgơ̆r hăm rim hơnih jang tơm, rim tơring pơtoi tơgŭm pơm trong hiôk vă Jơnŭm jang gah Chih nơ̆r pơma xa ăn Trung ương keh đang tơnăp sơnong jang; lăng tơdrong jang sơkơ̆t pơtôch pơm jang, tơroi tơbăt, jang atŭm hơlen nơ̆r pơma xa jing sơnong jang chinh trĭ kơ po, tơgop pơjing tơdrong jang chih nơ̆r pơma xa kăch mạng Việt Nam gơh hơgei, akŏm tơdrong joh ayŏ lơ̆m chăl hơtŏk tơ-iung 'nao.