Kiơ̆ tơdrong hơlen năng đơ̆ng Khul Dăr lăng kơsô̆ 26, Khul kơdră chĕp kơ̆l Đảng dêh char Đắk Lắk hlôi kơchăng tơlĕch jang kiơ̆ ‘lơ̆ng dôm trong jang, tơdrong tơchơ̆t đơ̆ng Trung ương. Dêh char tơtom hơmet pơ ‘lơ̆ng khul jang, hơtŏk tơdrong pơjao klăih song hơnăp jang, hơmet ming trong pơm hla ar păng tơplih hăm kơmăy sô̆. Hăm tơdrong jang tŏk mŭk drăm, Đắk Lắk hlôi chih pơjing trong jang tŏk rim sơnăm, rim anih jang, rim tơdrong jang; pơjing Anih pơgơ̆r jang tŏk mŭk drăm 2 kơsô̆, atŭm hăm ‘nŏh tơlĕch lơ trong jang vă atŏk tơiung mŭk drăm, tơpôl. Lơ̆m tơdrong tơchơ̆t Kơsô̆ 57, dêh char adrin jang kiơ̆ lơ̆m dôm tơdrong jang, trong vă jang găh khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆.

Hăm đon pơhnŏng jang tŏk truh 2 kơsô̆, Khul dăr hơlen akhan, tơdrong pơjao hơdăh hơnăp jang tŏk ăn 102 xăh, phường oei tam mă ‘lơ̆ng. Tơdrong jang đei dôm tơdrong jang kăl lơ̆m jăl khei mă I kŭm nhen tơdrong jang tŏk hrei ‘nâu tam mă pơm lăp hăm tơdrong ‘mĕh vă. Kơplăh ‘nŏh, 1,2 tơdrong jang đei lơ tơdrong ‘lơ̆ng nhen chă tơmang lăng, jang bri ‘long oei tam mă iŏk yoa pơđĭ, kơsô̆ tơgop ăn tơdrong jang tŏk mŭk drăm kơ dêh char oei tŏ sĕt.

Lơ̆m khei ‘năr tơlĕch jang tơdrong Tơchơ̆t 57, mĭnh ƀar tơring oei tơƀâp pơmat tat mưh chih hơdăh tơdrong jang. Dang ei oei đei 56 hla ar chih đei ƀơm truh trong pơgơ̆r jang khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ tam mă đei sek tơlang. Anih jang kơmăy kơmŏk roi tơbăt, kơsô̆ chih răk păng dôm tơdrong pơvih ăn tơplih hăm kơmăy sô̆, mă loi tơ̆ tơring hơtăih yăih oei tam mă ‘lơ̆ng, ƀơm ưh ‘lơ̆ng truh tơdrong đei yoa mưh tơlĕch jang.

Tơ̆ jơ bơ̆jang, dêh char Đắk Lắk apinh Trung ương hơlen năng, hơmet pơ ‘lơ̆ng dôm tơdrong tơhlăk ƀơm truh teh choh jang xa, mir đak lar; tơdrong tơchĕng hơmet ming xăh iĕ; hơmet pơ ‘lơ̆ng tơdrong tơgŭm hăm khul kăn ƀô̆ tơ̆ tơring păng hơnơ̆ng tơrek truh tơdrong tơmât jên jang pơm trong. Atŭm hăm ‘nŏh, tơring kŭm athei đei trong tơgŭm hơdrô̆ vă pơjing jơhngâm pran jang tŏk tơ̆ hơnăp kơnh.

Bí thư Đảng dêh char Đắk Lắk Lương Nguyễn Minh Triết đei nơ̆r apinh: “Apinh khul đei hla ar chih tơroi vă dêh char jang kiơ̆ tơdrong Tơchơ̆t 72 đơ̆ng Quốc hội găh jang pơlong năng 1,2 tơdrong tơgŭm hơdrô̆ ăn Buôn Ma Thuột, khŏm pơjing Buôn Ma Thuột jing tơring tơm dơnơm kơ Tây Nguyên vă đei jơhngâm jang tŏk ‘lơ̆ng ăn tơring âu; Mă 2 ‘nŏh tơ̆ găh Hơlĕch đei tơring jang mŭk drăm Nam Phú Yên, gơ̆h pơma jơhngâm pran vă jang tŏk đei 2 kơsô̆ dăh mă ưh ‘nŏh athei lăng đơ̆ng tơring jang mŭk drăm âu. Nhôn apinh jang kiơ̆ tơdrong hơgăt 127 sơnăm 2012 đơ̆ng Khul kơdră teh đak nhen thoi Tơring jang mŭk drăm Bắc Vân Phong vă gơ̆h đei trong sơng iŏk jên tơmât jang tơ̆ tơring âu.”

Hơlen năng tơdrong jang đei dôm tơdrong jang tŏk mŭk drăm, tơpôl kơ dêh char Đắk Lắk, ƀok Nguyễn Thanh Nghị akhan, tơdrong jang tŏk mŭk drăm hrei ‘nâu đơ̆ng dêh char oei hơtăih ƀiơ̆ tôch dêh pơting hăm đon pơhnŏng jang tŏk truh 2 kơsô̆. Tơdrong jang tŏk oei tam mă tơgăl hăm tơdrong ‘lơ̆ng đơ̆ng tơring. Khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ tam mă tơgăl jing jơhngâm pran gĭt kăl vă atŏk tơiung mŭk drăm.

Kơdră chĕp kơ̆l Khul dăr lăng kơsô̆ 26 athei, dêh char hơnơ̆ng hơlen năng rim tơdrong tơ̆ tơring; akŏm jơhngâm hơmet pơ ‘lơ̆ng dôm tơdrong oei tơhlăk găh hla ar vei lăng, anih tơmât jên jang, tĕch mơdro; hơtŏk tơdrong đei yoa ‘lơ̆ng mưh vei lăng, hơtŏk tơdrong tơplih hăm kơmăy sô̆ păng bơ̆ jang hrơ̆ch ‘lơ̆ng dôm tơdrong jang tŏk, mă loi jĭ atŏk tơiung khul jang vă pơjing đei tơdrong ‘lơ̆ng ăn tơdrong jang tŏk hrĕnh păng pran kơjăp.

“Athei iĕm hơlen năng dơ̆ng rim tơdrong ‘lơ̆ng tơ̆ dêh char vă pơyoa ăn tơdrong jang tŏk; hơlen năng rim hla ar vei lăng, anih tơmât jên jang, tĕch mơdro kơ dêh char, hơmet ming trong pơm hla ar, vei lăng ‘nao ‘lơ̆ng, tơplih hăm kơmăy sô̆ thoi yơ athei iĕm jăh hơlen năng vă hơmet ming dôm tơdrong oei tơhlăk, akŏm đei jơhngâm pran păng tơlĕch jang hrơ̆ch ‘lơ̆ng dôm tơdrong jang tŏk gĭt kăl, mă loi jĭ găh khul bơngai jang rơgei”.