Dêh char Đắk Lắk sơng đei hlŏh 5,33 triu ‘nu bơngai, iŏk đei hlŏh 56% nơ̆r hơgăt lơ̆m sơnăm, tŏk hlŏh 37% pơting hăm khei âu sơnăm sơ̆. Akŏm đĭ đăng jên iŏk yoa đơ̆ng chă tơmang lăng đei 9.600 ti, tŏk vă jê̆ 38% pơting hăm khei âu sơnăm sơ̆. Đăk Lắk hlôi pơm đang hla ar athei UNESCO chih tơbăt “Đon rơgei mưh pơtăm ot hơmet cheh phe”, pơm hla ar chih tơbăt tơdrong juăt kăp gĭt ăn tơdrong soi “Et ming yang klang đak kơ bơngai Rađe”; atŭm hăm 'nŏh tơlĕch tơdrong tơgŭm vei lăng păng tưk tơiung kơjă kăp gĭt đơ̆ng tơdrong juăt tôn chĭng chêng đơ̆ng 2026-2030.

Dang ei dêh char oei akŏm jơhngâm tơlĕch dôm tơdrong jang atŏk tơiung chă tơmang lăng đơ̆ng 2026-2030, hơmet ăn tơdrong lêh Sầu riêng Đắk Lắk sơnăm 2026, atŭm hăm ‘nŏh atŏk tơiung dôm tơdrong chă tơmang lăng 'nao, tơplih hăm kơmăy sô̆, pơjing hơnăn chă tơmang lăng păng hơtŏk 'lơ̆ng khul bơngai jang vang tơgop bơ̆ jang đei đon pơhnŏng jang tŏk mŭk drăm truh 2 kơsô̆.

Jang kiơ̆ sơnăm Tơmang pơhiơ̆ Teh đak 2026 hăm hơnăn "Bri kơdrơ̆ng hơsơ̆ng truh đak dơsĭ”, lơ̆m 6 khei ou ki, lơ̆m dêh char Gia Lai sơng đei dang 8,75 triu ‘nu tơmoi, tŏk 19% pơtêng hăm dôm khei ou lơ̆m sơnăm sơ̆. Akŏp iŏk đei đơ̆ng tơmoi tơmang pơhiơ̆ đei truh 19.000 ti hlak jên. Mă kăl, tơmoi teh đak đe tŏk 80%, tơƀôh hơdăh tơdrong iok đei jơnei đơ̆ng rim tơdrong jang pơtrŭt, tơƀôh tơbăt tơ̆ lơ teh đak nhen Hàn Quốc, Philippines păng Australia. Lơ hơnih truh lơ̆m dêh char hơnơ̆ng đei lơ tơmoi teh đak đe năm truh, lơ̆m ou Quy Nhơn đei hơnih chih kơtơ̆ng ang tơmang pơhiơ̆ Lonely Planet rơih tơmơ̆t lơ̆m Top 25 hơnih truh hơ iă hloh ăn tơmang pơhiơ̆ đak dơsĭ sơnăm 2026.

Kiơ̆ trong tŏk kơtang ou, Gia Lai tơlĕch jang truh sơnăm 2030 sơng đei 18,5 triu ‘nu tơmoi, jang sa iŏk đei đơ̆ng tơmang pơhiơ̆ dang 35.000 ti hlak jên lơ̆m sơnăm. Vă tơlĕch jang kiơ̆ ‘lơ̆ng trong jang, dêh char tŏk bŏk akŏm hơvơn rim bơngai tơmơ̆t jên jang iung jang rim tơdrong vă jang tơmang pơhiơ̆ tih să; adoi jang kiơ̆ trong tơlĕch jang "3K - 3A", krao hơvơn rim kon pơlei đei jing mĭnh ‘nu “bơngai tang măt tơmang pơhiơ̆", đei: Ưh kơ dui hor, Ưh kơ tŏk kơjă, Ưh kơ hŭt rơ̆m rĕk kư̆ kă - Sơđơ̆ng, phăl hơlăng, pơm ăn lăp đon.