Hlŏh 1 khei đơ̆ng rŏng kơ Festival pơkao Đà Lạt ‘măng mă 9 sơnăm 2022, tơmoi năm tơ̆ plt âu roi đunh roi lơ. Tơ̆ pơlei pơkao Đa Thiện, 1 lơ̆m 5 pơlei pơtăm pơkao đơ̆ng sơ̆ kơ plt Đà Lạt, tơmoi chă tơmang lăng đei mât lăng lơ̆m pơgar, hăm lơ kơloăi pơkao tôch ‘lơ̆ng, chă lăng kon pơlei pơtăm, vei rong pơkao. Bơngai chă tơmang lăng Trần Thanh Trà, truh đơ̆ng plt Hồ Chí Minh, pơma găh tơdrong năm tơmang lăng đơ̆ng kơdih: “Ƀôh cham char tôch hơiă, tơpă mơ̆n ‘nâu jĭ plt ƀĕnh tơdrong tơhưch, jĭ pơlei tơm pơkao ‘lơ̆ng rŏ. Rim kơloăi pơkao đei kơmâu, ƀou phu phara băl… đĭ đăng tôch ‘lơ̆ng, păng chôh tơbŭk tơbăk ‘lơ̆ng rŏ”.

Kŭm hăm pơlei pơkao Đa Thiện, dôm pơlei pơkao Xuân Thành, Vạn Thành, Thái Phiên, Hà Đông kơ plt Đà Lạt kŭm pơtăm, ming pơdă lơ kơloăi pơkao tôch ‘lơ̆ng, pơm lăp hăm tơdrong pơvih ăn rim bơngai truh lăng. Ƀok Vũ Anh Dũng, tơ̆ plei pơtăm pơkao Hà Đông, phường 8, plt Đà Lạt, ăn tơbăt, kon pơlei tơ̆ kueng kơphô̆ pơm hơmet trong, pơrŏ dôm anih tơmang lăng hăm dôm kơloăi pơkao ‘lơ̆ng rŏ: “Pơlei jang pơkao nhôn pơm lơ anih chă tơmang lăng ăn tơmoi truh ngôi. Mưh đei tơmoi truh nhôn đei bơngai tơƀôh trong năm ba tơ̆ dôm anih mă tơmoi ‘mĕh năm. Vă akhan, tơmoi ‘mĕh truh lăng tơ̆ pơgar pơkao kŭk ‘nŏh nhôn năm ba tơ̆ pơgar pơkao kŭk, dôm pơgar pơkao ly, pơkao hông kŭm đei bơngai chông ba trong ăn tơmoi ‘năi. Tơpă ‘nei, jơhngâm đon kon pơlei tôch čhôk ‘nă mưh pơm anih chă tơmang lăng tơ̆ dôm pơlei pơtăm pơkao thoi âu”.

Mưh truh hăm dôm pơlei pơkao, tơmoi đei lăng 1 năr đe choh jang, pơtăm, vei rong dôm kơloăi pơkao, ƀum, plei ‘long ‘lơ̆ng tơ̆ Đà Lạt, kơdih kâu chă phĕ bơ̆n plei dâu tây đum, mât hơdai lơ̆m tơdrong arih xa kơ bơngai Đà Lạt. ‘Ngoăih kơ dôm anih yoa pơlei jang pơkao pơm, tơ̆ âu oei đei lơ anih chă tơmang lăng găh tơdrong choh jang xa đơ̆ng dôm công ty, anih chă tơmang lăng tơ̆ plt pơm dơ̆ng. Kiơ̆ ƀok Nguyễn Hùng Vỹ, tơ̆ pơlei jang pơkao Vạn Thành, tơdrong hơnhăk dôm pơlei juăt pơtăm pơkao, dôm anih chă tơmang lăng găh tơdrong choh jang xa vă pơyoa ăn tơmoi truh lăng hlôi pơih đei trong jang xa ‘lơ̆ng hơiă ăn kon pơlei tơ̆ tơring. Yoa dôm tơmam ‘lơ̆ng đơ̆ng kon pơlei jang chŭn mir jang đei gô đei lơ bơngai chă hơlen năng păng băt truh, đơ̆ng nŏh pơ ư pơ ang hơnăn tơmam, pơm hơtŏk kơjă tơmam păng hơnhăk ăn iŏk yoa kơjăp ‘lơ̆ng ƀiơ̆. Găh nŏh dơ̆ng, mưh lơ tơmoi truh tơmang lăng ‘nŏh sư dui ba lơ tơdrong pơvih pơvăn nai tŏk kiơ̆ ‘năi.

Ƀok Nguyễn Hùng Vỹ, pơma: “Chă tơmang lăng găh choh jang xa tơ̆ pơlei pơkao Vạn Thành oei tŏk tôch ‘lơ̆ng, hơnhăk đei iŏk yoa kơjăp. Plt kŭm oei pơlung, pơjing tơdrong ‘lơ̆ng tôch ai ăn kon pơlei tơ̆ plei jang pơkao kŭm nhen dôm anih jang xa tơ̆ tơring jang tŏk kiơ̆ trong chă tơmang lăng choh jang xa. Jang chă tơmang lăng hai, pơm tơlĕch tơmam hai, trong jang âu inh ƀôh tôch đei yoa”.

Kiơ̆ ƀok Tôn Thiện San, Kơdră vei lăng kon pơlei plt Đà Lạt, ƀât Festival pơkao Đà Lạt ‘măng mă 9 păng Tết Nguyên đán âu, plt vă pơgơ̆r tơdrong “Đà Lạt – Chă tơmang lăng tơ̆ dôm pơlei pơkao”, vă roi tơbăt găh tơdrong pơjing, jang tŏk, tơdrong ‘lơ̆ng đơ̆ng groi tĕh, kon bơngai tơ̆ dôm pơlei jang pơkao đơ̆ng sơ̆ hăm tơmoi chă tơmang lăng. ‘Nâu kŭm jing tơdrong ‘lơ̆ng vă pơlung, krao hơvơn anih jang, kon pơlei tơ̆ dôm pơlei jang pơkao hơnơ̆ng hơtŏk tơdrong pơjei băl jang xa, tơmât jên atŏk tơiung choh jang xa tơklep hăm hơtŏk tơdrong pơvih pơvăn, chă tơmang lăng. Ƀok Tôn Thiện San, ăn tơbăt, tơ̆ ning mônh kơnh, plt vă chĕng hơmet, tơproh trong atŏk tơiung dôm tơdrong chă tơmang lăng âu vă pơm hơtŏk iŏk yoa găh mŭk drăm ăn tơpôl:

(Băng): “Dôm pơlei pơkao chă jang xa ‘nao ƀât hơyak blŭng a đĕch, nhôn oei pơjing, tơproh ming trong jang ăn dôm pơlei jang pơkao, mưh trong tơproh jang đei kĭ ăn ‘nŏh vă pơjing dơ̆ng dôm pơlei pơkao mă ‘lơ̆ng ƀiơ̆. Nhôn vă pơjing dôm trong jang âu kiơ̆ pơlei jang pơkao păng gô đei dôm tơmam ‘lơ̆ng kơdih vă atŏk tơiung tơdrong ‘lơ̆ng đơ̆ng pơlei pơkao ‘nŏh. Tơ̆ hơnăp dang ei pơlei pơkao oei đei tơmam ‘lơ̆ng đơ̆ng kơdih, pơtih gia nhen pơlei pơkao Vạn Thành hrei ‘nâu, đei lơ tơmoi păng gơ̆h chă tơmang lăng tơ̆ gơmăng hai. Găh nŏh dơ̆ng, dôm anih jang tơlĕch jên jang bơih ‘nŏh plt gô tơgŭm roi tơbăt, tơgŭm thim jên vă chô̆ kơƀŏng điên tơ̆k ang hơdăh tơ̆ trong pơkao, vă gơ̆h chă tơmang lăng tơ̆ gơmăng”.

Hăm dôm trong vă jang lơ̆m tơdrong tơproh trong jang, hơdai hăm hơtŏk iŏk yoa KHKT mưh choh jang xa, gơ̆h lui dôm pơlei jang pơkao lơ̆m plt Đà Lạt hơnơ̆ng jang tŏk pran păng kơjăp, pơm pơ ‘lơ̆ng hlŏh dơ̆ng ăn tơring pơkao âu.