Ƀlep ƀât Tết Nguyên đán Bính Ngọ 2026 (đơ̆ng ‘năr 27 khei 12 truh ‘năr 6 Têt), dêh char Lâm Đồng bơngai năm chă tơmang lăng tŏk lơ. Kiơ̆ Anih vei lăng kon pơlei dêh char, akŏm đĭ đăng tơmoi chă tơmang lăng, pơdơ̆h ngôi đei dang 925.000 ‘nu bơngai, tŏk 32% pơting hăm Têt Ất Tỵ 2025; lơ̆m noh tơmoi đơ̆ng teh đak đe đei dang 62.000 ‘nu bơngai. Akŏm đĭ đăng iŏk yoa đơ̆ng chă tơmang lăng dang 1.850 ti hlak jên. Tơmoi truh lơ đơ̆ng ‘năr 2 truh ‘năr 4 Têt; lơ anih tep pơdơ̆h tơ̆ Đà Lạt, Phan Thiết păng Mũi Né đei ƀĕng bơngai truh pơdơh. Tơdrong iŏk yoa lăm tep jô̆ păh lăp lơ̆m dêh char đơ̆ng 80–85%, ăn ƀôh tơdrong chă tơmang lăng hơnơ̆ng vă tŏk pran dơ̆ng, pơjing tơdrong ‘lơ̆ng ăn tơdrong jang tŏk tơ̆ anih âu lơ̆m sơnăm 2026.

Tơmang lăng Khánh Hòa iung jang sơnăm ‘nao hăm đei ƀôh ‘lơ̆ng ƀơ̆t kơsô̆ tơmoi tŏk lơ, lơ hơnih ƀĭch pơdơh ƀĕnh bơngai ngăl, akŏm iŏk yua năr Tết Bính Ngọ 2026 đei dang 2.200 ti hlak jên, tŏk hloh 62% pơting hăm khei ‘nâu sơnăm sơ̆. Đơ̆ng ‘năr 29 khei 12 âm truh ‘năr 5 Tết, Cham gre păr apŭng plĕnh teh Cam Ranh pơvih ăn vă jê̆ 800 ‘măng păr hăm hloh 140 rơbâu ‘nu tơmoi; hơdai hăm ‘noh jĭ đei lơ tơmoi truh hăm trong teh. Tơdrong jang chă ngôi pơyan puih mak đei ƀôh chơt hơiă tơ̆ dôm hơnih chă năm lăng ‘lơ̆ng. Lơ̆m dêh char sơng dang 320 rơbâu ‘nu tơmoi ƀĭch pơdơh, tŏk hloh 12%; lơ̆m noh tơmoi apŭng plĕnh teh đei dang 120 rơbâu ‘nu, tŏk hloh 23%. ‘Nâu jĭ tơdrong hiôk vă tơring hơnơ̆ng hơtŏk tơiung tơmang lăng, yak truh tơdrong hơgăt iŏk đei 77.000 ti hlak jên lơ̆m sơnăm 2026.

Kiơ̆ Anih vei lăng jŏh ayŏ kơ dŏ xoang, Tơplŏng kơdâu păng chă tơmang lăng dêh char Đắk Lắk, lơ̆m 6 năr Têt (đơ̆ng 17 - 22/2), lơ̆m dêh char sơng đei dang 395.000 ‘nu tơmoi, akŏm đĭ đăng iŏk yoa đơ̆ng chă tơmang lăng dang 457 ti hlak jên. Pơting hăm Têt Ất Tỵ, tơmoi chă tơmang lăng tŏk 33% , iŏk yoa tŏk lơ ƀiơ̆ 25%. Dôm tơring, anih chă tơmang lăng tơ̆ bri brăh, chă tơmang lăng găh jŏh ayŏ kơ dŏ xoang lơ̆m tơpôl tơ̆ tơring găh Pơmât hơnơ̆ng jing anih truh sơng đei lơ bơngai, oei tơ̆ tơring Hơlĕch ‘noh đei lơ bơngai truh tơmang lăng tơ̆ đak dơsĭ. Lơ tơdrong jŏh ayo kơ dŏ xoang, tơplŏng kơdâu ƀât blŭng sơnăm ‘nao đei pơgơ̆r nhen thi hao thŏng nan xăh Krông Ana, hao thŏng nan tơ̆ dơnâu Suối Bùn (xăh Sơn Hòa) păng dôm tơdrong ngôi pơchơt vă pơgơ̆r tơ̆ hơnăp kơnh hai. Dôm tơdrong ‘nâu vang tơƀôh hơdăh tơdrong pran ‘lơ̆ng đơ̆ng chă tơmang lăng tơklep hăm dôm tơdrong jŏh ayŏ kơ dŏ xoang păng truh lăng ngôi tơdrong arih xa lơ̆m tơpôl.