Tơdrong ming man pơtơm tơlĕch jang ah blŭng sơnăm 2021, pơtơm jang atŭm noh ah sơnăm 2022 tơ̆ teh să 1.810 ha. Truh dang ei, lơ tơdrong tơm kơ Ming man hlôi keh đang gah păr dăr lăng tơdrong trŏ păng sơkơ̆t hơdah gah trong păr. Kiơ̆ tơdrong hơlen đơ̆ng Grŭp pơm jang gah cham gre păr (Air Transport Action Group), ah tơmơ̆t yua, Cham gre păr kơtă pơjing đei pơhlom 22.000 tơdrong jang, tơgop pơhlom 3,7 tih đôlar minh sơnăm... Hăm tơchơ̆t khŏm mă ming man cham gre păr Long Thành – jăl mă  1 keh đang hơdrol kơ năr 19/12/2025 asong mah ăn kơsô̆ gre păr tŏk jur trŏ kih thuơ̆t pơkăp, tơmơ̆t yua tơdrong ming man ah tong hơnê̆ sơnăm 2026… Sơkơ̆t ah pơtôch jơ pơm jang, Tổng Bí thư Tô Lâm bơnê kơ rim Anih jang tơm, rim tơring đei tơrĕk truh, mă blŭng hlôi hơdrin vei sơđơ̆ng ăn tơdrong ming man keh đang trŏ tơchơ̆t tơlĕch.

Ră hơdah tơdrong kăp gĭt kơ Ming man ou, Tổng Bí thư akhan, athei ming man Cham gre păr Apŭng plenh teh Long Thành iŏk yua hăm pơkăp hloh kơ dôm tơdrong phara băl, yuk hơlou, jing tơdrong pơtih 'nao gah tơdrong ming man rơgei, kơjăp sơđơ̆ng, jing anih truh 'lơ̆ng hloh kơ tơring Đông Nam Á. Tơ̆ jơ pơm jang, Tổng Bí thư adoi pơtruh nơ̆r gah minh ƀar tơdrong pơtruh đơ̆ng rim tơring, tơ-'ngla asong ming man păng pơjao ăn Anih jang Trung ương Đảng chih akŏm, pơtruh ăn rim anih jang đei tơrĕk chă hơlen lăng tenh kuăng sek tơlang kiơ̆ sơnong gơh jang kơ po, vei sơđơ̆ng trŏ tơchơ̆t đơ̆ng khôi luơ̆t păng kiơ̆ pơkăp tơgŭm đĭ đăng vă Tơdrong ming man gơh keh đang trŏ tơchơ̆t tơlĕch, hơtŏk tơ-iung kơjăp lơ̆m jăl jang truh.