Kơtơ̆ng ang gah jăl trong kơdou hrĕnh 'nao pơtoi đơ̆ng Peiku găn Buôn Ma Thuột năm truh Gia Nghĩa, tŏk bŏk đei lơ tơdrong gô chang đơ̆ng kon pơlei Tây Nguyên, tơring kơtang gah choh jang xa păng tơdrong kăl chơ pơdŭ tơmam drăm. 'Nhŏng Nguyễn Phúc Lâm, bơngai vơ̆r gre tih chơ tơmam kiơ̆ trong Gia Lai – pơlei tơm Hồ Chí Minh tơroi: “Ou ki đei kơtơ̆ng vă pơm trong kơdou hrĕnh Pleiku – Đăk Lăk – Gia Nghĩa, mưh kĕ man inh ƀôh kăp gĭt tơpă. Kơlih tơmam drăm chơ pơdŭ kiơ̆ trong kơdou hrĕnh gô jăng hloh kơ jăl trong nai, vih vơ̆t sơđơ̆ng, pơyua lơ gah mŭk drăm”

Ƀok Vũ Duy Hùng, bơngai oei tơ̆ xah Gào dêh char Gia Lai, chơt hơ-iă oei gô chang trong kơdou hrĕnh dah đei ming man: “Inh chơt hơ-iă dêh. Mă mônh noh vih vơ̆t hiôk hian, tenh hloh, tơmam choh pơtăm đei chơ pơdŭ tenh kuăng hloh. Kon pơlei chang ngeh thoi ăi đĕch, teh đak hơtŏk tơ-iung noh kon pơlei kŭm hơtŏk tơ-iung mơ̆n”

Kiơ̆ tơlĕch chă hơlen, jăl trong kơdou hrĕnh Pleiku – Buôn Ma Thuột – Gia Nghĩa jĭ minh pah kơ jăl trong kơdou hrĕnh Tu – Pơbah gah Pơmơ̆t. Jăl trong hơtaih pơhlom 258 km, drơh trong să mah ăn 4 tong gre năm hơdoi, hăm kơsô̆ jên asong ming man jê̆ 77 rơbou tih hlj. Ah kơ̆l pơih blŭng jăl trong noh pơtoi hăm Jăl trong 19 tơ̆ tơring Bàu Cạn, găn tơring teh kơ dêh char Gia Lai, Đăk Lăk hơdrol kơ pơtoi hăm tơring Gia Nghĩa păng jăl trong kơdou hrenh Gia Nghĩa – Chơn Thành, kơ dêh char Lâm Đồng.

Ƀok Thái Đại Ngọc, jang lơ̆m Trung ương Đảng, Ƀĭ thư Tĭnh uy Gia Lai akhan, jăl trong kơdou hrĕnh ưh hơdrô̆ pơjing jơhngơ̆m pran hơtŏk tơ-iung mŭk drăm mă oei tơgop hơtŏk tơdrong jang hơdoi, vei sơđơ̆ng tơpôl teh đak – tơpôl hơrih xa tơ̆ tơring Tây Nguyên. “Jăh vă sơkơ̆t hơdah, jăl trong kơdou hrĕnh 'noh hơnih tơm tơroh tơring dih băl păng pơjing jơhngơ̆m pran ăn 3 dêh char, iŏk yua dôm tơmam drăm choh pơtăm jang kiơ̆ trong 'nao. Gô tơguăt kơjăp hăm vei sơđơ̆ng tơpôl hăm dôm teh đak đei atŭm trong sơlam teh kiơ̆ pơkăp hơtŏk tơ-iung kơjăp. Hăm Gia Lai 'noh 56,7 km, gô asong jên mong teh đak kiơ̆ rim sơnăm nhôn adoi vei sơđơ̆ng 'lơ̆ng”

Dang ei, jăl trong kơdou hrĕnh Pleiku – Buôn Ma Thuột – Gia Nghĩa tŏk bŏk đei hơlen, pơkăp asong jang. Mă oei kăl khei năr vă pơtơm, mă lei kon pơlei păng jơnŭm pơgơ̆r tơring tơ̆ rim tơring Tây Nguyên tŏk bŏk oei gô chang jăl trong gô hrôih đei ming man, pơm trong hiôk ăn tơdrong vih vơ̆t, chơ pơdŭ tơmam drăm păng pơih trong hiôk ăn hơtŏk mŭk drăm tơ̆ tơring.