Xơnăm hŏk 2022-2023, hnam trưng THCS xăh Đăk Mar, apŭng Đăk Hà đei 673 hŏk tro, lơ̆m noh 321 ‘nu hŏk tro noh kon hơ ioh kon kông.

Duch pơtho Phạm Thị Kim Hồng, Phŏ Kơdră hnam trưng ăn tơbăt, atŭm hăm hnam trưng tơm, hnam trưng oei đei hnam trưng klăh mă 2 tơ̆ thôn Kon Gung - Đăk Mút hămm trong ataih pơhlom 11km. Tơ̆ hnam trưng âu đei 7 lăm hŏk hăm 230 hŏk tro bơngai hơdrung Bahnar păng Xơ Đăng. Vă tơdrong pơtho hŏk pơhrăm adoi đei jơnei tơnăp, Khul Kơpal kơ hnam trưng THCS xăh Đăk Mar axong 7 bơngai pơtho noh đảng viên pơgơ̆r dôm lăm hŏk păng bơngai pơtho hlôi chĕp vei tơnăp xơnong kơ bơngai pơtho Kon pơlei: “Chi ƀô̆ hnam trưng pơjao ăn đảng viên pơgơ̆r dôm lăm păng năm truh rim tơring kơ thôn pơgơ̆r dôm khul unh hnam hơlen tơnăp hŏk tro vă băt hơdăh hăm đei năm hŏk dăh mă ưh, vă đơ̆ng noh chă hơvơn pơtho năm hŏk pơhrăm. Pơm kiơ̆ tơdrong pơtho pơhrăm mă bơngai pơtho ƀơm tơnap tap kiơ noh gô pơma dơnuh kơtă hăm đe đảng viên chiu phŭ xơnong jang tơm noh. ‘Nguaih kơ noh duh pơjao ăn đảng viên chiu pŭ xơnong jang hadoi hăm dôm kơdră thôn vă hơvơn hơlên hŏk tro năm hŏk”.

Tơpă ăn ƀôh tơdrong pơtho hŏk pơhrăm tơ̆ hnam trưng tơm duh nhen hnam trưng klăh thôn Kon Gung- Đăk Mút kơ hnam trưng THCS xăh Đăk Mar, apŭng Đăk Hà noh xơđơ̆ng ‘lơ̆ng. Hnam trửng ơgoh ‘lơ̆ng păng tơguăt nhen pơjing jơhngơ̆m pran lơ̆m rim ƀai pơtho hŏk đơ̆ng bơngai pơtho duh nhen tơdrong hŏk hlôh vao đơ̆ng đe hŏk tro. Hăm kon pơlei kon kông tơ̆ âu, um ai bơngai pơtho jing tơguăt tơjê̆, ‘mêm kơ eng. Kon pơlei hơnơ̆ng tơroi dih băl kơdih po pă đei tơrĕk tơdrong hŏk pơhrăm ăn kon hơ ioh bơngai pơtho. Đơ̆ng dôm tơdrong jang tơnăp, hơdăh đơ̆ng đe thâi kô hlôi hơvơn tơgŭm kon pơlei tơplih đon kơchĕng, lăng tơgĭt hloh tơdrong hŏk pơhrăm kon hơ ioh po. Pơmai Y Thoan, kon pơlei Kon Gung đei kon tŏk bŏk hŏk lăm 6 tơroi kơ đon bơnôh pôk bơnê kơ po thoi âu: “Bơngai pơtho tơ̆ âu noh dăp đon dăp bơnôh, tơnăp hăm hŏk tro, hơnơ̆ng yak hadoi hăm hŏk tro. Hŏk tro mă yơ tơjruh noh oei đei axong hŏk adrô̆. Bơngai pơtho tơnăp hloh, truh rim hnam vă hơlem hơvơn năm hŏk. Mĕ ƀă yơ tam mă băt hơdăh noh oei pơtho ăn mĕ ƀă băt trong erih, pơtho kon hơ ioh po. Hŏk tro ưh kơ lui noh kô pơtho truh tơ̆ hnam ăh mă mĕ ƀă xư oei tơ̆ hnam adoi pơm ‘mơng mă kô pơtho hơvơn tơ oei tơ̆ noh vă pơtho kon hơ ioh ăn mĕ ƀă mơ̆ng. Bơngai pơtho lơ ‘măng năm truh noh hăp duh tơplih đon kơchĕng dang ei duh oei năm hŏk hơlơ̆k dơ̆ng”.

Đơ̆ng tơdrong dăp đon dăp bơnôh lơ̆m tơdrong juăt jang kơ khul bơngai pơtho tơ̆ hnam trưng THCS xăh Đăk Mar, tơdrong pơ ‘năm adrin hŏk pơhrăm đơ̆ng đe hŏk tro tơ̆ hnam trưng hơnơ̆ng đei hloh 90%. Tơdrong đei jơnei âu noh hiôk hian hăm dôm hnam trưng tơ̆ tơring đei ƀôh, chŏng mă hăm minh hnam trưng mă lơ kơsô̆ hŏk tro kon kông pơhlom 47% jing kăp gĭt hloh. Ưh adrô̆ pơtho chư păng tơdrong hlôh vao, đe thâi kô oei pơtho ăn hŏk tro po băt găh trong oei xa, tơgŭm hơtŏk jơhngơ̆m ăn đe oh kơ ‘nôh hloh. Oh Y Kim Lan, hŏk tro lăm 7C, hŏ tơ̆ hnam trưng thôn Kon Gung - Đăk Mút ăn tơbăt: “Đe thâi ko hơnơ̆ng tơrĕk tơgŭm nhôn, tơjê̆ hăm nhôn. Thâi kô tơ̆ âu noh tơnăp dăp đon dăp bơnôh pơtho ăn kơ nhôn. Bơngai pơtho duh nhen mĕ ƀă mă 2 kơ nhôn. Inh gô adrin hŏk pơhrăm mă rơgei vă pôk bơnê kơ tơdrong hlôi pơtho ăn kơ nhôn”.

Atŭm hăm tơdrong jang “pơhrăm kon bơngai”, 42 bơngai pơtho tơ̆ hnam trưng THCS xăh Đăk Mar oei đei dôm tơdrong tơgop kăp gĭt hăm jơnŭm pơgơ̆r tơring păng kon pơlei tơ̆ tơring lơ̆m pơm kiơ̆ Tơchơ̆t kơ teh đak găh pơjing tơring pơxĕl ‘nao.

Xơkơ̆t kon pơlei jing dơnơm lơ̆m pơjing tơring pơxĕl ‘nao, dôm xơnăm kơ âu hnam trưng THCS xăh Đăk Mar hlôi jang tơnăp tơdrong xơkơ̆t hŏk pơhrăm păng hŏk tơdrong jang ăn đe hŏk tro, mă kăl noh hŏk tro tơ̆ 3 pơlei kon kông Kon Gung, Đăk Mút păng Kon Klŏk.

Ăh hŏk tro mơ̆t hŏk lăm 9 rim bơngai pơtho pơgơ̆r lăm jang hadoi hăm bơngai pơtho dôm môn hŏk pơkăp chă axong tơgŭm hŏk tro kơdih xơkơ̆t tơdrong hlôh vao po vă xơkơ̆t pơtoi hŏk truh jăl 3 dăh mă năm hŏk lăm pơtho tơdrong jang. Hnam trưng THCS xăh Đăk Mar đei jơnei pơkăp tơroi tơbăt, hơvơn hloh 80% hŏk tro kon kông hŏk đang jăl THCS pơtoi kiơ̆ hŏk jăl 3 păng năm hŏk lăm pơtho tơdrong jang vă đei bơngai jang rơgei ăn kơ xăh. Ƀok Lê Xuân Hưng, Ƀĭ thư Anih jang Đảng xăh Đăk Mar xơkơ̆t, pôk bơnê tơdrong tơgop đơ̆ng đe thâi kô pơtho tơ̆ hnam trưng THCS xăh Đăk Mar hăm tơdrong pơtho pơhrăm păng pơm kiơ̆ Tơchơ̆t kơ teh đak găh pơjing tơring pơxĕl ‘nao kơ xăh: “Rim bơngai pơtho adoi chĕp vei đon bơnôh tơnăp kăp gĭt noh bơngai pơtho tơ̆ dôm hnam trưng pơkăp. Adrol ki, xăh pơjing tơring pơxĕl ‘nao dôm hnam trưng hlôi đei dôm tơdrong tơgop kăp gĭt vei xơđơ̆ng tơdrong ‘lơ̆ng rơgei păng kơsô̆ hŏk tro năm hŏkt ơ̆ lăm. ‘Nâu jing minh tơdrong pơkăp găh pơtho pơhrăm jing kăp gĭt hloh. Jăl THCS năm hŏk tơdrong jang păng hŏk truh jăl THPT, đe oh pơm kiơ̆ tơnăp, ưh đei tơdrong mă hŏk tro ưh đei năm hŏk tơdrong jang. ‘Nâu duh jing minh tơdrong pơtho pơhrăm kang ƀô̆ bơngai kon kông ăn kơ xăh”.

Hăm dôm tơdrong tơgop lơ̆m tơdrong jang “pơhrăm kon bơngai” duh nhen pơjing tơring pơxĕl ‘nao, pơtoi lơ̆m lơ xơnăm hnam trưng THCS xăh Đăk Mar đei jơnei hơnăn pơlong: Khul pơm jang gơh rơgei, Anih jang oei xa tơnŏ... Ưh adrô̆ vei kơjăp tơdrong đei jơnei xăh đei jơnei pơkăp tơring pơxĕl ‘nao, xơnăm 2021 âu ki xăh Đăk Mar, apŭng Đăk Hà, dêh char Kon Tum duh hlôi đei jơnei pơkăp tơring pơxĕl ‘nao kiơ̆ pơkăp ‘nao.