Hmach bơnê kơ tơdrong hơmet tơnăp đơ̆ng Hơnih jang Tuyên yăo păng Pơrô̆ pơrôp Trung ương ah mă chih akŏm đei Tơdrong jang tôm tơdrong, đei lơ hơnih 'nao gah đon tơchĕng, trong tơlĕch jang, Tổng Bí thư, Kơdră teh đak bơ̆n Tô Lâm ră hơđah, tơdrong chih akŏm tơdrong jang gah đon tơchĕng đơ̆ng Đảng lơ̆m khei năr tơplih kơmăi kơsô̆ noh athei kăp gĭt păng đunh đai. Tổng Bí thư, Kơdră teh đak bơ̆n ră hơdah, Tơdrong tơlĕch jang kăl sơkơ̆t hơdah Trong tơlĕch jang noh: “Kơchăng – Gơh hơgei – Trŏ tơchơ̆t – Đei jơnei”. Kiơ̆ đơ̆ng noh, Tổng Bí thư, Kơdră teh đak pơtruh nơ̆r, Tơdrong jang kăl băt hơdah 4 tơdrong pơgơ̆r jang tih, lơ̆m noh athei kơjăp gah đon tơchĕng jang đơ̆ng Đảng, atŭm hăm noh tơplih kơtang hloh tơdrong jang gah đon tơchĕng.

Đon bơnôh ưh tơplih vă ưh đei yak hơvơ̆l kơ trong; tơplih 'nao ưh đei lê̆ tơjruh. Tơdrong jang gah đon tơchĕng roi năr roi 'nao hơgei gah trong jang, roi kơjăp gah chĭnh trĭ, đon tơchĕng, trŏ tơdrong tơchơ̆t tơlĕch jang. Ƀok adoi tơroi hơdah 8 grŭp jang tơm vă keh đang Tơdrong pơkăp jang. Gah đunh đai kơnh, Tổng Bí thư, Kơdră teh đak bơ̆n Tô Lâm adoi pơgơ̆r, tơplih 'nao gah tơdrong pơtho pơhrăm pơma xa chĭnh trĭ, hŏk pơhrăm tơdrong tơchơ̆t mă trŏ tơpă. Tơdrong tơm noh pơm ăn tơdrong pơhrăm gah nơ̆r pơma xa, pơhrăm tơchơ̆t gơh tơnăp hloh, tơguăt hăm tơdrong jang hloh; pơhrăm vă hlôh vao kloh klĕch, iŏk yua trŏ, pơm jang drơ̆ng minh, jang truh tôch.