Grŭp jang T&T tơbăt, tŏk bŏk chă tơchĕng hơlen tơmơ̆t jên jang Hơnih kơdrơ̆m păh Hơlĕch Buôn Ma Thuột hăm groi teh să dang 680 ha, akop kon jên tơmơ̆t vă jang dang 44.400 ti hlak jên păng Hơnih Kơdrơ̆m păh Hơlĕch trong ver Trong glung 1 tơ̆ phương Tuy Hòa, phương Bình Kiến hăm akŏp kon jên tơmơ̆t jang hloh 20.100 ti hlak jên. Hơnih mơdro sa jei pơma tơbăt jơhngơ̆m đon ‘meh vă atŏk tơ iung rim tơdrong vă jang ŭnh hơyuh kial, ŭnh hơyuh jơ̆ng ‘năr tơ̆ Đắk Lắk lơ̆m khei ‘năr truh ou kơnh. Tang măt ăn Grŭp jang T&T hơlen, Đắk Lắk đei lơ tơdrong hơ iă atŏk tơ iung găh choh jang sa, ŭnh hơyuh, mơdro sa, tech mơdro păng tơmang pơhiơ̆; adoi pơma pơkăp chă hơlen tôch brĕ rim nơ̆r apĭnh tơmơ̆t jên jang, sơđơ̆ng jơnei păng trŏ lăp hăm trong vă atok tơ iung kơ dêh char. Hôn bơnê kơtang tơdrong lăng kơjăp đơ̆ng Grup jang, ƀok Lương Nguyễn Minh Triết, Bí thư Đảng dêh char Đắk Lắk akhan, tơdrong hơnih mơdro sa iung jang năm dăr lăng hơken, tơlĕch nơ̆r ‘meh vă tơmơ̆t jên jang rim tơdrong vă jang tih ‘noh jing tơdrong hơ iă hloh hăm trong tơlĕch jang hơvơn tơmơ̆t jên jang đơ̆ng dêh char. Ƀok jei athei rim hơnih bơ̆ jang hơnơ̆ng iung jang hơdoi, atok kơtang xek tơlang keh đang hla bơar hăm rim tơdrong vă jang kăl vă hrôih đei jang kiơ̆ ƀlep tơdrong ‘meh vă tơmơ̆t jên jang.