Hôn bơnê kơtang tơdrong iung jang đơ̆ng rim tơring lơ̆m hơmet ăn tơmam drăm, hnam trương lăm hŏk, khul ƀok thây kô pơtho, kơsơ̆p hla bơar hŏk păng trong tơgŭm djru bơngai hŏk, Tổng Bí thư, Kơdră chĕp pơgơ̆r teh đak akhan, sơnăm hŏk ‘nao gô jing trong jang pơlong năng hăm tơlĕch jang kiơ̆ Tơdrong tơchơ̆t 71 đơ̆ng Hơnih tơm Chinh trĭ. Bơngai chĕp kơ̆l Đảng, Teh đak athei rim tơring proh hơmet sơđơ̆ng hnam trương, lăm hŏk, ƀok thây kô pơtho, kơsơ̆p hla bơar păng tơmam drăm pơyoa pơtho hŏk pơhrăm; tơlĕch jang kiơ̆ ‘lơ̆ng trong jang “tơ̆ yơ đei hŏk tro, tơ̆ noh đei ƀok thây kô pơtho”, ưh kơ lê̆ hŏk tro ayơ pơdơ̆h kơ hok kơ yuơ ŭnh hnam mơmat tat. Adoi, Hơnih vei lăng pơtho pơhrăm kăl tơplih kơtang đơ̆ng trong bơ̆ jang vei lăng jing chĕp pơgơ̆r atŏk tơ iung, tơlĕch jang kơtang pơtho pơjing khul bơ̆ jang hơgei pơvih pơvăn ăn khoa hok kmăi kmŏk, tơplih ‘nao tơchăr, tơplih kơsô̆ păng rim tơdrong jang kăl kơ teh đak.