Dôm năr ‘nâu, mưh kơmăng jur tơ̆ xăh Ea Drăng, dêh char Đắk Lắk, lơ jăl trong hla kơ teh đak kŭm hăm unh điên măt ‘năr tŏk hơdăh ƀrŭng ƀrăng pơm tơplih ‘lơ̆ng hơiă ăn um ai pơlei pơla. Tơ̆ plei Lê B, trong kơjung dang 3km adrol ki kơmăng gueo guônh, ưh đei bơngai yak vih vât dang ei ƀrŭng ƀrăng unh điên tơ̆k hơdăh. 2 păh trong, đei hơtâp, hơtol lơ hla kơ teh đak kơpal rim bơbŭng hnam.

Ƀok Nhan Ngọc Tấn, Bơngai vei lăng Khul kon pơlei jang chŭn mir plei Lê B ăn tơbăt, tơdrong tơplih âu gơnơm đơ̆ng tơpôl kon pơlei mât 1 ƀơ̆r đon, vang bơ̆ jang tơgŭm: “Kiơ̆ đơ̆ng roi tơbăt krao hơvơn, ‘noh kon pơlei kŭm nhen bơngai jang lơ̆m khŭl adoi drơ̆ng tơgŭm. Đơ̆ng trong hla kơ đei pơm hơmet ‘lơ̆ng ‘nŏh cham char tơ̆ plei Lê B kŭm roi ‘lơ̆ng ‘năi păng sư tơiung đei jơhngâm hưch hanh, roi ‘mêm kơ teh đak đơ̆ng rim kon pơlei nhôn.”

Ưh lăp chô̆ unh điên tơ̆k hơdăh ‘lơ̆ng ăn trong đĕch, lơ bơngai jang lơ̆m khul kon pơlei jang chŭn mir tơ̆ xăh Ea Drăng oei vei kơjăp tơdrong vei lăng rơgŏh ‘lơ̆ng trong pơlei, pơtăm pơkao tơ̆ jih trong păng pôm akŏm rim kơloăi râm rĕk pha ra băl. Kiơ̆ yă Vũ Thị Thúy Hòa, Kơdră vei lăng Khul kon pơlei jang chŭn mir xăh Ea Drăng, tơdrong kăl hlŏh jĭ tơiung đei đon kơchăng đơ̆ng kon pơlei lơ̆m dôm trong jang vei lăng kơdih kiơ̆ đơ̆ng dôm tơdrong jang tôch rơđăh, pơm tơplih đei um ai păng đon tơchĕng vei lăng cham char tơ̆ tơring kon pơlei oei xa: “Ưh đei gô chang, gơnang yoa, ‘mĕh xa hơpăh đơ̆ng tơdrong tơgŭm đơ̆ng teh đak đĕch mă nhôn krao hơvơn đĭ đăng tơpôl vang jang kiơ̆ đơ̆ng lơ trong jang vei lăng kơdih mưh hơmet pơ ‘lơ̆ng trong tih tơ̆ pơlei, pơm trong unh điên ƀrach ƀrônh kŭm nhen pôi akŏm rim kơloăi râm rĕk pha ra băl vă huei pơm ‘mê̆ ‘mach cham char”.

Tơ̆ phường Buôn Hồ, dêh char Đắk Lắk, dôm Khul kon pơlei jang chŭn mir krao hơvơn bơngai jang vang pôi akŏm râm rĕk, hơmet pơ ‘lơ̆ng pu ao chai, kơchai pơgang sơdrông, pơjing jăl trong ‘you, rơgŏh ‘lơ̆ng păng găn ƀiơ̆ tơdrong iŏk yoa pơgang sơdrông lơ̆m tơdrong choh jang xa. ‘Nao âu, trong jang "Khul kon pơlei jang chŭn mir tơlĕch tơdrong jang vei lăng rơgŏh ‘lơ̆ng cham char" tơ̆ plei Tring 1 păng plei Tring 2, iŏk đei tơdrong tơgŭm, vang jang tôch hơiă đơ̆ng kon pơlei.

Ƀok Y Tích Mlô, tơ̆ plei Tring 2, phường Buôn Hồ ăn tơbăt: “Nhôn tôch hơiă păng bơnê tơdrong pơngơ̆t đơ̆ng Khul kon pơlei jang chŭn mir tơgŭm ăn kơthŭng mong râm rĕk păng unh điên măt ‘năr tơ̆k hơdăh tơ̆ kơmăng. Nhôn vă adrin vei lăng ‘you rơgoh păng vang jang lơ̆m dôm tơdrong vei lăng ‘lơ̆ng cham char vă pơlei pơla roi đunh roi rơgŏh ‘lơ̆ng ƀiơ̆”

Jơ̆p lơ̆m dêh char Đắk Lắk dang ei oei đei 187 trong jang Kon pơlei jang chŭn mir vang vei lăng cham char tơklep hăm pơjing tơring tơrang ‘nao. Lơ tơring hlôi pơjing đei lơ jăl trong ‘you rơgoh, ‘lơ̆ng hơiă, pơih xă dôm trong jang pôi akŏm, rơih hơmet rim kơloăi râm rĕk, tơmam đơ̆ng choh jang xa păng iŏk yoa pơgang sinh hŏk lơ̆m tơdrong choh jang xa. Ƀok Ya Toan Ênuôl, Kơdră vei lăng Khul kon pơlei jang chŭn mir dêh char Đắk Lắk ăn tơbăt, đon pơhnŏng đơ̆ng rim tơdrong jang ưh lăp hơmet pơ ‘lơ̆ng cham char, um ai tơ̆ tơring tơrang đĕch mă oei vă pơjing tơpôl kon pơlei oei xa gơ̆h hơgei, ‘lơ̆ng hơiă, lơ̆m noh kon pơlei jĭ tơm dơnơm:

“Khul hơnơ̆ng chih hơdăh pơjing tơring tơrang ‘nao, khul kon pơlei jang chŭn mir athei iŏk jang tơm vă pơgơ̆r bơ̆ jang, tơƀôh trong chong glung păng tơguăt đĭ đăng hơdai. Pơgơ̆r tơlĕch tơdrong jang mă hơdăh, klăih song hơnăp jang mă rơđăh, vă akhan rơđăh bơngai, rơđăh tơdrong jang vă akŏm đei rim răih, tơklep hăm tơdrong jang pơjing tơring tơrang ‘nao hơdai hăm pơm hơtŏk tơdrong arih xa ăn kon pơlei”.

Tơ̆ dôm pơlei pơla kơ dêh char Đắk Lắk hrei ‘nâu, tơdrong tơplih ‘nao ưh lăp tơ̆ lơ jăl trong ang hơdăh păng rơgŏh ‘lơ̆ng đĕch, mă oei ƀôh hơdăh kiơ̆ đơ̆ng kon pơlei pơtơm kơchăng bơ̆ jang atŭm vang vei lăng rơgŏh ‘lơ̆ng anih kơdih kâu arih xa. Iŏk đơ̆ng tơdrong choh jang xa, arih xa, đe sư kŭm roi đei đon vei lăng ‘lơ̆ng cham char arih kơdih, vang tơgop hơmet pơ ‘lơ̆ng um ai ‘nao tơ̆ tơring tơrang roi đunh roi ‘you rơgŏh, roi đunh roi ‘lơ̆ng rŏ ƀiơ̆./.